劉小慧、黎瑞恩同湯寶如呢三個昔日嘅「寶麗金三小花」，𠵱家全部已為人母，各有各嘅生活，名副其實嘅淡出娛樂圈。
前晚佢哋三個難得聚首，仲約埋其他朋友一齊喺九龍灣食飯敍舊，咁啱近嚟唔少80年代嘅歌星，好似劉美君同關淑怡都復出喺紅館舉行演唱會，唔知係咪咁，忽然有消息傳出，話有人斟洽佢哋一齊復出，有可能出一張唱片同埋一齊搞個演唱會。
間中會敍舊
馮仁昭就呢件事打電話問小慧係咪真有其事？小慧回應話：「我哋噚晚係約埋一齊出嚟食飯，仲有其他朋友㖭，我哋間唔中都會約出嚟食吓飯敍吓舊，耐唔耐就會見吓面傾吓偈，之但係就冇人斟我哋復出喎！就算搞三人演唱會都冇啫！」
大女功課忙
至於佢有冇心癢癢想復出唱歌同拍戲呢？小慧笑住咁話：「間唔中唱吓就冇乜所謂，但講到好認真嗰種復出呢，咁就要畀好多時間，仲要落足心機先至會好成績。」小慧話𠵱家大女Yumi功課好忙，一定要佢睇住，已經忙到冇時間，所以佢真係冇諗過復出。另外，噚日係小慧細女Ina生日，今日就輪到佢老公蘇志威，佢話會一家人開開心心咁慶祝！