張立基在娛樂圈「失蹤」多年，談及他95年因事業走下坡而精神出現問題的傳聞，張立基承認當年被圈外女友欺騙金錢和感情，因而沉淪自殺。日前他談到近年歌手頻頻走音的情況時，自爆自己初出道經常走音外，更指同是跳舞出身的郭富城早年唱歌也頻頻走音。
撰文：戴彩煥
現年41歲的張立基，86年在亞視第一屆《未來偶像爭霸戰》取得冠軍而入行，曾推出過《妳好嗎》和《ElectricGirl》等受歡迎歌曲，及至00年舉行過音樂會及推出單曲《蛇舞》後，從此人間蒸發。
半年前，記者曾兩度邀張立基做專訪，可惜他兩度甩底，及至第三度邀約，他終於現身。對於近年銷聲匿迹，張立基解釋：「我想過另一種生活，所以離開香港過吓流浪式嘅生活，但我好多時返內地演出，同姑姐喺新加坡又搞美容院，一路都有工作。」
被女友騙幾百萬
95年張立基事業陷低潮，被傳精神有問題，其後曾在無綫節目中聲淚俱下作出大平反，重提舊事他不無感慨：「其實當時有個拍咗拖兩年幾嘅女朋友，唔單止呃咗我幾百萬，仲呃埋我嘅感情，因為佢，我曾經服藥自殺過，喺屋企昏迷咗三日三夜。好多人以為我因為事業低潮搞成咁，其實我根本唔care，在我嚟講愛情係大過天。因為呢個女仔，我匿喺屋企三個月唔見人，因為佢，令我對感情好抗拒。」
「以前EMI唱片公司高層何哲圖（Herman）曾經勸我唔好同呢個女人一齊，我應承咗佢，但最後都係同番佢一齊，令到Herman好嬲，諗番轉頭，我真係好天真好儍。」
讚舊愛葉玉卿叻
張立基出道20多年來，最為人熟悉的其實是他初出道時與葉玉卿的一段情，對於葉玉卿現在家庭事業兩得意，張立基亦忍不住大讚說：「佢係好叻嘅人，尤其是喺美國開銀行，真係好犀利。」
雖然離開樂壇多年，但張立基仍有留意現今樂壇走勢，揚言較欣賞欣宜、側田和鄧麗欣（Stephy）：「側田幾有潛質，但如果內斂啲，唔好咁輕佻會好啲。」
當面指城城走音
Stephy因為唱歌走音而被封「鄧走音」，張立基卻不以為然說：「有幾多個唔走音吖！我初初都走音，郭富城以前都走音㗎，𠵱家咪又OK。我好記得有次喺紅館同城仔講過一番說話，我話：『城仔，我同你都係跳舞出身，我好高興見到你有今日成績，我當你朋友，唔好嬲我，你走音，但唔緊要，我都走音，希望下次你唔好再走音。』」
如此直接跟城城講說話，難道不擔心對方不高興？張立基說：「佢唔鍾意唔緊要，你諗吓有冇人咁同你講先，你好嘅時候，全部人都捧你、擦你鞋。佢當日好認真聽我講，但我做人最大缺點係直，直係要付出代價，會失去好多朋友，要嬲我唔緊要，起碼我有嗰份誠意。」
談動向，張立基表示早前跟內地一間唱片公司簽約，準備再戰江湖，問可擔心被指過氣歌手，或是被香港觀眾遺忘？張立基巧妙地說：「一套戲有主角有配角，得一個主角係做唔到成套戲嘅。」
攝影：陳慧安
愛情事業雙失
張立基的娛樂圈生涯有如坐過山車，曾攀過高峯、又跌過谷底被迫潛水。兜兜轉轉，已度過了20年人生。
一夜成名
張立基86年參加亞視舉辦的《未來偶像爭霸戰》，憑一曲《偷心者》奪得冠軍，由寂寂無聞的舞蹈員搖身一變成明星。
舞動全城
舞蹈員出身的張立基唱跳舞歌曲為主，當年他拍攝《ElectricGirl》MV，邊唱邊與女舞蹈員跳辣身舞，掀起全城狂熱，成為當時紅極一時的跳舞歌手。
對卿心死
張立基與葉玉卿的一段情最多人談論，當年他與女方分手時，更一度受情緒困擾。事後張立基接受訪問，提到舊愛時表示已經心死。
痛哭平反
95年張立基的事業開始走下坡，被指精神有問題之餘，又被「恆星」追債20多萬元，人生陷入低潮。他在無綫節目《大平反》中，提到自己的不幸際遇及前路茫茫時，一時感觸流下男兒淚。
復出咪嘴
95年後，張立基猶如人間蒸發般絕迹娛樂圈，00年重返樂壇在大學會堂開騷，獻唱一曲《蛇舞》時竟然播帶，然後又借葉玉卿過橋，將兩人的片段在演唱會中播放（右圖）。
