鬍鬚曾喺立法會辯論財政預算案期間玩失蹤，立法會內會主席劉健儀代表議員，向政務司司長唐英年篤佢背脊，質疑財爺唔尊重議員。唐英年噚日回覆議員，指官員出席會議嘅時間長短，應由官員自行決定，即係唔關佢事。
各黨派議員得悉唐唐竟然咁樣回應，異口同聲話非常不滿同震驚，擺明當立法會冇到啫，惟獨第一大保皇黨民建聯，全程好似植物人咁呆坐，冇人開腔。民主黨馬丁忽發奇想，突然提出一個感謝鬍鬚曾動議，「本會全心全意、甘心接受財政司司長對本會採取不睬不理，可來則來、可不來則不來的態度，並致以熱烈鼓掌作支持。」
民建聯狂鬧馬丁
馬丁呢個動議擺明玩嘢，民建聯議員有責任保皇，即刻由啞仔變惡爺，狂鬧馬丁個動議擦鞋，又指如果動議通過咗嘅話，真係將立法會變成垃圾會。雖然馬丁係惡作劇，但都要正式表決，民建聯焗住陪佢玩，同民主黨、自由黨、泛聯盟等齊齊投反對票否決動議。可能動議字眼太複雜，有議員唔明，民建聯陳鑑林、自由黨劉皇發、楊孝華等都中招冇舉手反對，又或者佢哋真心想熱烈鼓掌支持鬍鬚曾都唔定。