英冠常規賽明日煞料，上周貼衰波屈福特導致全軍盡墨，受到小挫折，可幸當上擂台4月盟主冲喜；今周重點推介狼隊同卡廸夫城贏波，兩者賠率偏熱，最宜博單W2串1。
首選鬥志如虹嘅狼隊，目前排第7，只比升班線上嘅第6位水晶宮及走勢惡劣嘅第5位嘅屈福特少1及2分，明日迎戰已無目標嘅普利茅夫，必全力爭贏及更多入球；只要後兩者任何一隊有閃失，贏波嘅狼隊即可趕上打季後升班附加賽尾班車。
狼隊最煞食係一前一後，威爾斯國腳門將軒尼斯年少有為，剛入選英冠最佳陣容；22歲箭頭艾賓斯比歷克貴為英冠前列射手，在歇冬期碰巧就是由普利茅夫以逾百萬鎊轉會費過檔，有衝刺力有膽識，轉會後無損戰力，下半季聯賽上陣19次，替狼隊攻入12球，今周面對舊會、作客失波率偏高達45%嘅「普利」冇留手，主W及「讓球主客和」「主勝」俱可捧。
敲卡廸夫城主W
另一場博在聯賽已無目標嘅卡廸夫城主場埋齋，主因對手班士利在足總盃4強出局同護級成功後有散晒之感，財困下勢無力用高薪留住好波之人白賴仁侯活，全隊踢得好，但人工加得少，士氣勢受打擊；何況踢法爽朗有隊形嘅卡廸夫城5月下旬還要在足總盃決賽鬥老樸，戰意及狀態絕不會在此刻回落，反而希望今次主場踢得好好睇睇，吸引球迷屆時決賽到溫布萊捧場；加上中堅佩斯打甩紅牌不用停賽，喜事重重，今場勢「大」勝一場。
昆士柏博「大」霧
另一場博大霧，昆士柏流浪主場迎來季篤定重返英超嘅西布朗，前者有英國首富鋼鐵大王支持，水頭充足，勢成來季新力量，明日面對揚言要爭冠軍賀升班嘅西布朗，眾將必以殺低強敵為榮，筆者懶理勝負，只希望兩隊演入球騷。最後提提波友，上季英冠煞科，開8「大」3「細」，當中一場開夠7球，另外3場亦有5球，不妨備忘。
近5場往績：輸贏輸輸贏
蘋果波神
今季唔得，咪下季嚟過囉！