城中富豪為咗做奧運火炬手出盡法寶，少數人如願以償搶到位，噚日正式出場傳送聖火，可能搶住做火炬手時已經醜態百出，有人各出奇謀搶鏡，希望攞番個尾彩，唔好再人前獻醜。「疑似特首候選人」梁振英天生異稟高人一等，估唔到跑步姿勢都異於常人，提腿邁步誇張過人。
唔講唔知，原來佢為咗做好火炬手，早前睇咗幾本專業跑步書，自修跑步姿勢，八方睇佢步姿，估計佢係師承日本「固力果」門下，大家唔信可以睇吓似唔似。梁振英呢種跑法長處係有姿勢，實唔實際就唔知，最少八方睇到差啲笑到失聲，夠晒娛樂性。
藍衣人扶李澤鉅隻手
曾憲梓下盤乏力，所以要坐輪椅傳聖火，不過勝在隻手可以舉起成百斤重（佢自己講㗎），小超人李澤鉅可能相反。八方見佢噚日步履穩健，然而舉起火炬隻手卻好似冇乜力，支火炬喺佢手上頻頻「不舉」，傍住佢護送聖火嘅藍衣人好似擔心火炬跌落嚟有辱國體，不時扶起佢隻手，提醒佢舉高啲支火炬。
恒基四叔嘅大仔李家傑平日幾低調，唔似得細佬家誠同弟婦徐子淇咁成日現身ball場，喺娛樂版、八卦雜誌曝光，原來佢都幾鬼馬。噚日百幾位火炬手，不論係天王巨星、達官貴人定係學生哥，都要着上大會提供一式一樣運動衫，想出位就要花啲功夫。李家傑可能心血來潮，竟然戴住副太陽眼鏡傳送聖火，可惜噚日成日天陰陰，想搵滴太陽照吓都難，莫非李家大公子怕聖火刺眼，要戴副黑超擋一擋？佢呢個獨一無二黑照look出奇制勝，搶晒鏡。
賭王何鴻燊今日喺澳門傳聖火，乖女超瓊快老竇一步，噚日已經完成火炬手神聖任務。超瓊平時係女強人，噚日卻好青春咁戴住個純情白色五環頭箍開跑，據知個頭箍連埋一套火炬手運動衫，由贊助商提供，汪阿姐都有戴上頭箍，同超瓊清純feel互相輝映。
超瓊細妹拉大隊捧場
兩個細妹超鳳、超蕸拉大隊同成班朋友到場為家姐打氣，超瓊跑完後話傳送聖火令佢好感動「真係感受到中國人嘅團結，同埋香港人係好熱情咁迎接聖火，呢個係屬於中華民族驕傲嘅一刻！」
噚日有人舉起「愛黨愛國大能晒」橫額，沿途為權貴火炬手贈興，八方相信代表幾多香港人心聲。
mailto:[email protected]