小妹早幾日約咗個好耐冇見嘅老友食晏，佢喺保險公司做，一邊食一邊傾偈，佢問我有冇買個人意外保險。我心諗，一場出嚟食飯即sell保險；我臉有難色話買咗一份。老友笑笑口話，唔好誤會，只不過知道小妹轉咗工，提醒一下記住通知保險公司啫，否則有乜嘢冬瓜豆腐，分分鐘冇得賠。
點解呀？佢話，有個case當事人原本做文職嘅，買咗份個人意外保險，之後佢轉工做咗空姐，一次執勤不幸受傷。之後佢同保險公司claim保險，竟然冇得賠。原來佢嗰份空姐工作，喺佢份保單屬不保項目，而佢轉咗工又冇通知保險公司改保單，咪冇得賠囉。
老友補充話，唔同工種遇到嘅意外機會都好唔同，所以個人意外保險一般都會按職業嘅類別，決定係唔係接受個別客戶投保。如果客戶喺成功投保後轉工，當中涉及工作性質嘅改變，好似由文職轉為外勤或職業司機，一定要通知保險公司。保險公司將會按個別情況，決定是否需要增加保費，及保留續保的最終決定權。仲有，從事高危職業嘅人，好似警隊、軍隊、消防隊等等，保險公司一般都唔受保。僱主要為有關員工購買特別嘅意外保險。
逢周六、周日刊出