周杰倫前晚喺北京工人體育場舉行世界巡迴演唱會嘅北京站，佢唔單止大唱勁歌，仲大跳熱舞，唱足三個鐘頭之餘，加上有南拳媽媽做嘉賓，搞到全場觀眾都high晒。周杰倫又表演彈鋼琴同古箏，將現場嘅氣氛推到更加高，由於今次係北京站，佢除咗加插唱京劇，仲即場教大家跳「奧運加油操」，近8萬人一齊做體操，場面哄動。