八方嘅老闆肥佬黎噚日出席一個新聞自由研討會，會上話雖然辦報要賺錢，但都要講信念，壹傳媒登陸台灣好成功，但佢話唔「恨」北上，因為入內地辦報要作出一啲妥協，佢唔會咁做。
樹大招風，肥佬黎話佢啲仔女出街都不時被人指指點點，有時啲細路返到屋企會同佢講：「爹哋，今日又有人講你壞話。」肥佬黎講到呢度有啲激動，話惟有同仔女講，如果老竇有錢，但同時俾人話係apieceofshit，做仔女會有乜感覺呢？似乎係希望仔女諗吓，老竇辦報係為咗理想，唔係一個有錢但冇品嘅人。
肥佬黎大情大性，講到七情上面，眼泛淚光話自己都想離開，慨嘆辦報唔係賺錢咁簡單，感慨太少人了解佢辦報理想。八方噚日見到肥佬黎頸上有撻紅印，佢澄清只係俗稱「生蛇」嘅帶狀疱疹，唔係「咖喱雞」，大家咪誤會。