《信報》專欄作家方卓如一直隱姓埋名，近日終於現真身，以真名龔耀輝之名出書，八方都有睇過佢本大作《分拆方卓如》，可讀性最高嘅唔係內文，而係由公民黨陳淑莊（Tanya）幫佢寫嘅序。
龔耀輝四年前角逐會計界落選，佢今年想捲土重來政界內人所共知，如果佢真係參選，即係公民黨譚香文對手，陳淑莊身為公民黨員，竟然咁大方幫人造勢，據知黨內部份人士好驚奇，咁做係咪太冇黨紀呢？
Tanya同八方講，自己係方卓如fans，雖然認識龔耀輝，但一直唔知對方就係方卓如，直至龔搵佢寫序，佢認為雖然大家政見唔同，不過朋友一場，寫篇序冇所謂，況且佢自己喺個序入面只係讚方卓如為人風度翩翩，絕對冇讚過龔耀輝嘅政見㗎。Tanya事後亦有同黨魁余若薇傾過，余大狀冇乜意見；至於譚香文一直認為最強對手另有其人，對呢件事有疑問，但冇意見發表。