花旗減息1/4厘，本地銀行維持利率不變，已經預咗，對港股冇負面影響，因為利率已經好低，市民供樓負擔大大降低，相對嚟講即係話供樓負擔能力高咗，大家應該明白點解香港唔減息，噚日地產股仍然有好表現。
內地股市「五一」假期休市，不過並冇影響港股炒上嘅興致，因為前晚花旗股市造好，港股好友大戶點會放過呢次難得嘅挾倉機會，恒指大幅裂口高開，雖然之後跌番多少，但係恒指仲有近500點進賬，企喺26000樓上，睇個勢港股仲係反覆向好格局，只不過成交唔算勁，所以大戶搵食只能靠挾倉。
正股有機挑戰32元
缸邊友話港股急升應該係「傳送聖火」嘅贈興節目，大家諗吓有冇關係？斷估唔會咁兒戲，港股部署炒上，上禮拜已經有迹可尋，炒上唔使搵藉口。下禮拜個市可以繼續睇好，但成交唔算大，揀股要小心啲，地產股會繼續強勢，自然係選擇之列，油價係咁跌，受惠股份亦可留意，尤其係沉咗好耐嘅航空股，至於車股、航運股，睇圖見靚亦可以炒。
中海發展C輪3821：中海發展（1138）昨收27.15元，一升就6個巴仙，由高位跌咗咁多，一日就吐晒啲烏氣，大成交支持股價上返10日線，短線最少可上試30元，破到就睇32元嗰頭。
可以諗吓隻中海發展C輪3821，隻輪昨收43仙，槓桿率6.3倍（有效3.9倍），正股如果升上32元，3821應該唔會低過77仙，正股跌穿25.80元，就沽咗隻輪止蝕。