李珊珊與舊愛錢嘉樂分手後，她早前與美國職業聯賽洛杉磯銀河領隊古烈治（RuudGullit）傳緋聞，珊珊前晚亮相《蘋果》網站直播節目《娛樂開CHAT》時，更大方談感情問題，她說：「人大個咗，我識朋友有個信任圈，唔會亂畀人行入去，我好怕男仔小器，咁樣好失禮。細過我嘅男仔都接受唔到，35歲前腦囟未生埋，我又怕啲男人掛住夜夜笙歌。」
珊珊嘴邊不停盛讚古烈治高大威猛，她說：「佢料事如神，我哋雖然相識時間短，但大家惺惺相惜，嗰次玩仲好盡興。」二人可有發展機會？她說：「我希望大家畀空間我交朋結友。」大家可登入《蘋果》網站 http://ent.appledaily.com隨時重溫節目。採訪：比華利、懷鈺 攝影：仇志中
髮型：JaniceLam
化妝：CharlesWong（LaBoutiqueSalon）
讚古烈治夠高大 Rine
Rine：我想問吓你係點樣識古烈治呢？
珊珊：喺上海囉，康宏晨曦同洛杉磯銀河隊踢波記者會，見吓見吓咪話喺香港見，佢哋好nice，碧咸見你着運動衫呀，佢就好開心㗎，而且又住同一間酒店，咁咪friend咗囉。
Rine：咁我想問古烈治除咗球技叻，你最欣賞佢啲乜嘢呢？
珊珊：冇噃！做朋友做乜嘢要話畀你聽我欣賞佢啲乜嘢呀？！好人啦，因為細個鍾意睇佢踢波，𠵱家可以咁近距離接觸到，同埋難得有個人咁高喎，突然間覺得自己咁矮。幾開心，香港地好少男仔咁高。
養兩犬要有愛心 旺角Giff
Giff：我都有養狗㗎，你嗰兩隻幾多歲呀？
珊珊：一隻歲半、一隻五個月大。
主持：你隻狗喺唔喺度呀？帶佢一齊上鏡呀！
Giff：唔得喇，我嗰隻成十幾歲喇，太老喇。
珊珊：其實養小動物都要有心理準備佢會離開，好彩我呢兩隻仲咁細個，如果冇特別橫禍，佢哋應該可以有十年八年，最希望佢哋有精采嘅人生囉。
