馬路如虎口！昨日西貢南邊圍迴旋處發生嚴重車禍，一輛旅遊巴翻側，死傷眾多。由於該迴旋處是往西貢必經之路，部份住在該區的藝人，異口同聲指這條奪命斜路，設計危險易生意外，南圍村村長成奎安感嘆地說：「無端端又多咗寃魂！」每日必經此路的劉偉強大感心寒，而舊街坊張家輝也勸駕駛者落斜緊記收油。
採訪：陳寶明、戴彩煥、比華利、陳月媚
劉偉強：路經現場
朝早9點幾我揸車經過時，見到對面線肇事現場，架旅遊巴士撞成咁，已覺得心寒，肯定有好多死傷。早排附近先試過八車連環相撞，最好係用低波落斜，嗰個位置周不時會影快相，警方咁做都係想駕車人士可以減速，避免發生交通意外。我每日揸車返屋企都必經呢條斜路，會特別小心，一定會收油。
成奎安：真係陰功
我朝早10點幾出門口，行南圍舊路，所以見唔到斜路單交通意外，如果唔係我都會去幫手救人。後來我屋企人同好多朋友打電話話畀我知呢件事，聽到個心好唔舒服。嗰條路設計根本好有問題，我哋成日揸，揸咗幾十年都覺得嗰條路好危險，衝落嚟嗰吓一定要收油。
嗰度成日有交通意外發生，我覺得設計條路嗰個人對車冇認識，所以點危險都唔知，雖然嗰度成日有影快相，但政府唔係為安全，只係想罰錢啫，啲人見影快相收完油，之後咪又揸番快，我覺得會有反效果㖭。嗰啲乜嘢交通小組日日食阿公嘅，𠵱家咪等嗰啲要負責嘅人負責囉。唉，𠵱家條路無端端又多咗寃魂，真係陰功。
張家輝：落斜收油
我覺得呢條長命斜唔係咁難駕馭，只要遵守交通規則，一定唔會出事，但好多人就係輕視咗，以為條路咁闊、咁清同咁長，以為唔收油都冇事，但係落斜時車速會自然增加，好多嘢係你估唔到，所以行呢條大斜一定要收油入低波，託賴喺呢個黑點，我從未出過事。
萬綺雯：畫面太Sad
發生車禍嗰個位置幾危險，近迴旋處，真係唔開得快。我聽到消息都唔敢睇新聞，只係聽報道，因為個畫面太sad嘞！
黃德斌：好唔開心
睇到新聞好唔開心，嗰條斜路衝落嚟好快，所以車速限制係50公里，仲成日影快相，只要識收油唔超速就冇事。嗰度都唔算係交通黑點，以前未改建條路時仲危險。
莫可欣：意外難料
住開西貢嘅人都知嗰個位要開時速50公里同收油，習慣咗就唔危險，不過意外嘅嘢冇人控制得到，希望啲傷者冇事。我覺得罔顧乘客安危嘅司機，行為係好自私。
曹永廉：條路太斜
我哋今日外景，演員之間都討論呢單大車禍，大家覺得唔開心，始終死傷者太多。其實案發嘅位置真係幾危險，條路太斜，又經常有快相，有時啲司機仲會避快相緊急煞車，好容易引致意外。
琦琦：祝福傷者
每一位司機開得車，必要承擔自己、乘客同途人嘅安全，要小心留意路面情況，以及確保車輛機件性能，唔可以唔負責任，呢次車禍受傷嘅乘客大部份仲係長者，佢哋應變危難嘅反應一定冇咁快，我希望每位傷者可以盡快康復。
鄭嘉穎：唔好超速
吓，咁大件事！我喺湖南，唔喺香港，所以唔知道，但嗰條路成日影快相，我都喺嗰度俾人抄過一次，嗰度行車時速50公里，但自己唔覺唔覺都開到60幾。嗰條路已經整過一次，比以前闊咗，我覺得條路又唔係爛，都好平坦，只要揸車嗰陣奉公守法唔好超速，應該冇問題。我相信日後嗰條路一定更加多影快相。