今時今日講混能，已經唔係環保態度咁虛無，普通油$15.65一公升近乎失控，1,300c.c.車仔都講緊$1.3/km，更遑論大馬力車種，車主直頭流住血嚟揸車。
玩咗多年Hybrid嘅豐田，混能引擎技術越做越好，Lexus旗下豪華SUV車種RX400h，雖等同4,000c.c.級數，但耗油貼近$1.4/km，比同級車慳成蚊，揸足三日兩夜行咗四百幾公里，變相慳番四百幾蚊油錢，足夠同Honey開開心心玩番日！
記者：徐影龍
攝影：譚盈傑
Model：Jason、Tina
遊深淺赤石唔肉赤
同皇冠車行借架RX400h影相，第一時間諗試車路線，跑元朗天水圍一定走唔甩，不過超大長途搵阿水陪你咩。靈機一觸，不如同夢中情人遊港島吖，雖然本人唔方便經常出鏡，不過就搵咗個無我咁靚仔嘅Jason做替身，同Tina遊?深水灣、淺水灣、赤柱同石澳，感受吓混能帶嚟嘅無壓力遊車河之旅。
天朗氣清，中午跟Tina會合，途經深、淺水灣同石澳，沿途風光明媚，本來諗住同Honey沙灘漫步，不過佢嫌人多，改為飲咖啡談心。一杯咖啡賣成三十幾蚊，店員話油價升咗喎（你話影響幾大！），好在我架RX400h幫我慳番唔少油錢，無咁肉赤。
怕沙灘人多，不如兜返轉頭去赤柱Hea吖！美利樓嗰邊人流較疏落，影吓SnapShot都毋須左避右避，入啲仲有小徑，拖住手仔行都幾浪漫。
Hea完一輪，行番落赤柱市集買濕星嘢，一講掃貨，Tina不知幾開心，不斷掹人哋啲衫嚟試，最後揀咗條粉紅絲巾仔，好Cute呀！幾十蚊無所謂啦。
行到有啲攰，轉移陣地驅車直入赤柱墳場，貪嗰度夠靜。泊低架車同Tina過吓二人世界。我仲懶有心思咁打開尾門，齊齊坐車尾望住綠草地食有機車厘茄，溫馨得嚟咁環保，你哋唔恨得咁多喇。
最後揸埋架車去聖士提反灣睇日落，雖然天降驟雨，不過我就送咗支預早收埋嘅紅玫瑰畀Tiny，$4支咋嘛，𠱁得佢不知幾開心！其實同Honey遊吓車河，周圍Hea吓已經好好玩，唔一定唱K睇戲Shopping咁單調，環保之旅一樣好氣氛，大家不妨參考吓。
每公升油行11.2km
今趟三日兩夜試車體驗，的確令我對混能引擎有所改觀，唔單止跟汽油引擎表現一樣有心有力，透過ECVT電子無段變速系統，令引擎跟MG發動機能完美無間地運作，基本上你好難分辨到幾時用電、幾時行油，整體好順暢自然。
耗油量亦令我驚喜，走勻新界、荃灣同港島，密集市區佔40%，郊區佔60%，全程行咗433公里，油錶只係跌咗四分三，未計「缸底油」都仲有成格油剩，電腦計算每公升油行到11.2公里，除番現時油價只係$1.397！養開車就知呢個數字有幾犀利，始終RX400h屬4,000c.c.級數（3,300c.c.＋電能），周街J牌、B牌嗌緊近$3/km，即係慳番一半油錢有多，成架1,300c.c.車仔咁慳油，揸起上嚟壓力都無咁大啦，難怪政府第二年再批RX400h可以有環保優惠，出車慳多5萬蚊稅，令車主慳上加慳。
車廂闊落座椅舒適
雖然LexusRX400h受日圓升值影響而微調車價，不過扣番環保稅5萬蚊，目前出車只需49萬，以性能、設備及車廂豪華度計，已經唔算貴。
一坐上車，同行幾人均認同車廂布局頗有格調，波棍、中央儲物格，門邊把手等均用上鋁合金，軚環亦可隨意電控調校，加上獨立恒溫冷氣及全車9個安全氣袋等，在在顯示RX400h豪華氣派。
全真皮座椅好軟熟舒適，空間亦實在闊落，我綽號長腿叔叔，司機位已經被我推得好後，但後座綽號長腿Kelly嘅Model居然唔頂腳，可以想像即使全車坐滿5個大隻佬，一樣咁鬆動，SUV大得有道理。混能車仲有一個好處，就係以電動馬達行駛時，格外寧靜，配合MarkLevinson環迴音響系統，細細聲播CD或MP3已經聽得好清楚，毋須跟風聲、偈聲角力，令耳仔受罪。
LexusRX400h規格
引擎：3,311c.c.V6VVT-i
馬力：210ps/5,600rpm
扭力：288Nm/4,400rpm
交流電馬達
馬力：（前）167ps/4,500rpm（後）68ps/4,610-5,120rpm
扭力：（前）333Nm/0-1,500rpm（後）130Nm/0-610rpm
傳動：E-CVT無段變速自動波，四驅
查詢：皇冠汽車（25119430）
周末車展親摸親試
睇完今日環保溫馨之旅，係咪被其超低耗油打動到呢？心動不如馬上行動，今個周末落皇冠車行嘅「凌志Hybrid車展」度睇睇，就可以親身摸吓、感受吓RX400h或其他混能車種嘅優點。
日期：5月3及4日（星期六及日）
時間：10:00am-08:00pm
地點：尖沙嘴海港城海運大廈展覽大堂
查詢：25119430