今日係香港傳聖火嘅大日子，亦係本地商界顯示愛國嘅好機會，一班平日去邊都坐私家車嘅商家，今日都會放下身段通街走，好似長實（001）小超李澤鉅、恒地（012）大少李家傑、新地（016）老二郭炳江、信德（242）何超瓊等，仲有坐輪椅都要做火炬手嘅金利來（533）曾憲梓，唔少企業亦一早出內部通告，叫班員工一身「紅」返工。
據華華所知，大部份企業都發內部通告，鼓勵員工今日着到紅噹噹迎接聖火，又準備好迎聖火嘅貼紙畀大家，有啲仲送紅衫畀員工，講到最瞓身要數恒地同信和（083）。
信和員工午飯睇直播
恒地發言人話，鼓勵員工由今日到奧運閉幕期間「紅」到底，而最高領導人四叔李兆基，就鐵定打紅呔支持。信和就話管理層已經實牙實齒，今日會着紅衫，而晏晝1點至3點午飯期間，寫字樓員工仲可以到奧海城睇電視直播。
平時富豪多數着深沉色西裝，要加紅色服飾，最易搞係紅色領呔。想有多啲花臣突圍，本地時裝設計師鄧達智教路，最緊要由頭紅到落腳，例如戴帽或者頭巾，整到好似火炬咁，越誇越好。佢又建議曾憲梓，可以將架輪椅染紅，一定最矚目。至於要返工嘅富豪，唔想咁誇，戴紅框眼鏡一樣夠搶喎。
