一張火炬手名單，「恨」到各路人馬流晒口水、醜態畢現，行步路都腳震震嘅曾憲梓千辛萬苦霸到位，結果惹起公憤，「U-focus」四月中進行網上訪問，結果發現現年76歲、自認好大隻冇人敢搶佢聖火嘅曾憲梓力壓群雄，當選「最不想看見的火炬手」第一位，即係好多人想佢返屋企，唔好傳聖火。
第二位係淫照風暴男主角陳冠希，自從年初畀「性火」燒傷，佢就避走美國，淫照風暴「最佳女主角」阿嬌緊隨其後排第三，其餘令人覺得阻住地球轉嘅，仲有「疑似特首候選人」梁振英。
至於最想見嘅火炬手呢，「風之后」珊珊眾望所歸，其次係黃金寶，劉華同容祖兒都有份。亦有好多人唔想見到煲呔，佢自動「棄權」唔做火炬手係明智之舉。「U-focus」由民主黨員成立，呢個網上調查有103人回應。