假期前港股牛皮偏軟，大市冇焦點，一眾三四線股正好趁機會炒上，唔少細價股都見有資金炒作。其中升幅榜之冠係金匡（286），股價急升超過6成，收0.6元，而且成交有近1.8億元，好耐未見過。
此股年前曾經大炒富豪第二代入主概念，細細劉加入管理層後，股價失驚無神狂炒，惟其後細細劉突然劈炮唔撈，股份頓失概念之後，股價亦都拾級而下，由去年中兩個幾跌到3毫幾。
經常買大開細
金匡呢隻殼股炒咗咁耐，去年8月終於有嘢公佈，分別係跟潮流去內蒙搞礦，同埋透過搞甲醇項目引入建滔化工（148）為大股東，可惜遇上大市逆轉兼細價股少人炒，令到有「消息」股價都炒唔起。到咗今年2月，前大股東華置（127）又向建滔全數買番晒金匡股份，作價僅0.164元，之後又宣佈退出與建滔合作之項目，即係原先將金匡作為建滔旗下化工旗艦之計劃，全部推翻。
根據華置早前份通告，話明唔會注資入金匡，故上月初復牌後隨即急跌，今次炒上，基本上等於純博公司又有嘢搞，同系至祥（112）最近想搞注資亦都告吹收場，炒呢類殼股，要有「大輸」嘅心理準備，同純賭博冇乜分別。