今年3月底掛牌嘅旺旺（151）出咗年報，主席蔡衍明人工2369萬銀，加咗近三成七，仲有佢外甥鄭文憲，人工都加咗一倍幾。不過佢大仔蔡紹中人工唔高，反而減7%，點解咁偏心？
睇番年報，擔任執董兼幕僚處經理嘅蔡公子，行年26歲，01年喺加拿大國際學校（新加坡）畢業，之後幫手家族生意，蔡公子07年𢭃68.64萬銀，比06年少𢭃5萬幾。曾經講過話學歷冇用嘅蔡衍明，要阿仔高中畢業後到公司跟佢學嘢，話好過讀書喎，咁唔知減人工背後有冇暗示呢，唔通要阿仔交學費？
至於做非執董嘅鄭文憲，行年44歲，07年總人工有175.5萬，比上年𢭃嘅80.3萬多咗118%，係一眾高層中加得最多嘅，但其實佢薪金減咗近八萬銀，整體加得勁係因為花紅多咗約103萬銀。
據年報講，呢位外甥都幾猛料，家陣喺集團投資喺湖南長沙嘅旺旺醫院做CEO，早年喺早稻田大學商業研究院碩士畢業，做過日本住友集團證券，又喺日本大和證券台北子公司大和國泰證券做咗近十年副總裁。