有一本新英文雙週刊出版，上星期喺ThePawn舉行開幕酒會，上周末又在怡和大廈地庫Grappa's辦咗兩晚party，入場費二百元，據有到場參加嘅小B講，Grappa's裏面擠滿人，以外籍青年人佔多數，雜誌請咗一隊band現場表演，氣氛極為熱烈。按理怡和大廈鄰近國金二期，遮打道九號等外國銀行家雲集嘅大廈，如果有派對舉行，地點與交通都比蘭桂坊更方便。
呢本雜誌叫做TimeOut，每本售價十八元，全彩色精印，恐怕要賣一本蝕一本，經營模式當然係以廣告收入為主啦，與免費嘅同類小報HKMagazine差唔多。TimeOut出版後，HKM應會受到威脅，因為大家嘅讀者路線都係一樣：英文人，外國遊客，內容以吃喝玩樂、文化藝術、演藝為主，本地人反而唔會好注意到呢類報刊嘅存在，除非你經常在蘭桂坊蘇豪區行走啦。
打開本TimeOut創刊號睇吓，廣告真係唔少噃，如果以後期期都咁掂，保證有糧出！據曾在倫敦、紐約六星酒店工作嘅酒店小YY講：「呢本雜誌係酒店concierge（禮賓部）嘅聖經，喺倫敦工作之時，逢有住客行埋嚟問邊度有好戲睇，邊間餐廳正等等，禮賓部同事會立即揭開本TimeOut望一望，較為清閒時，佢哋會將本TimeOut逐頁睇清楚。遊客亦可以自己攞本嚟睇。今次TimeOut嚟香港開業，證明香港係國際城市喇啩！」
左丁山係大鄉里啫，未在歐美大城市居住過，唔識得咁多，以前有公關公司大員提議辦一份英文免費週刊，在機場到境大堂（禁區內）派發，以吸收餐飲旅遊廣告。此事後來不了了之，現在TimeOut呢份跨國雙週刊卒之在香港出現，證明呢條橋唔錯得晒。
睇完本TimeOut，突然間想起香港老早有人─就係肥佬黎──諗到呢條橋。《壹週刊》在一九九○年創刊不久，就有幾版叫做「下星期現在開始」（希望冇記錯），詳列香港餐飲戲院等節目，由一隊專人搜集資料。正是太陽之下無新事，世事如棋局局新，TimeOut將listing呢個方法發揮得淋漓盡致，抵佢做得咁大。