花旗20大城市嘅樓價錄得歷來最大跌幅，消費信心又落到5年低位，前晚花旗股市彈唔起已經預咗，不過跌幅較預期細，納指仲有得升，可見呢輪花旗股市似想炒上多過炒落。
同港股一樣，花旗股市成交好奀，投資者等緊聯儲局議息結果同睇吓會後有乜嘢講。減息1/4厘應該唔會有意外，如果份聲明冇暗示未來唔減息，美元可能會被質一輪，不過美元近日技術走勢已轉番強，質一輪挾返轉頭嘅機會唔細。
噚日A股走勢唔曳，上海A股指數升4.8巴仙，銀行股業績咁好，的確飲得杯落，不過H股呢邊就麻麻，可能同今日假期休市有關。睇番啲圖，「六行三保」有回吐壓力，但支持位好近，下調幅度應該唔會好大。
有報道指中央可能考慮將人民幣一次過升值10%，呢個世界乜嘢都有可能，但係凡事都有利有弊，睇嚟一次過升10%嘅機會唔大，就算係真嗰次，都唔會一早走漏風聲，跟呢個傳聞炒作，風險唔細。
中鐵建C輪1723：中鐵建（1186）昨收12.10元，逆市升2.7巴仙，試條20日線4日，終於見大成交炒上，短線12.30元有阻力，但破到就好大機會創新高，撲去13.80元，可以諗吓隻中鐵建C輪1723。
有機會升六成
1723昨收20.5仙，槓桿率5.9倍（有效3.8倍），仲有140日期，溢價11.9%，正股升上13.80元，1723應該有近6成升幅，正股跌穿11.40元沽出隻輪止蝕。