滙豐銀行宣佈，委任一位朝氣勃勃嘅年輕才俊──蘇包文剛為該行新任非執行董事，華華覺得呢位中奧（奧地利）混血靚仔AndreasSohmen-Pao，中文複姓「蘇包」非常特別，打聽之下，先知佢來頭唔簡單，係已故船王包玉剛外孫，即係船王大千金包陪慶同蘇海文嘅寶貝仔。
Andreas雖然年紀輕輕，仲未夠四十，但已經係繼承包氏皇朝──前稱環球航運集團嘅新加坡百國盛航運（BWShipping）真正揸fit人。
船王包玉剛膝下無兒，但有四朵金花，而佢嘅企業家精神同埋國際視野，亦深深影響後人同埋年輕一輩，單睇蘇包文剛個中文名，包含咗船王嘅名字，就知佢對呢位外公嘅景仰。
講起蘇包文剛父親蘇海文，亦非泛泛之輩，佢喺芝大讀法律博士時，邂逅船王大千金，後以包家大女婿身份，接掌船王航運王國，曾任立法局議員同香港總商會主席，跟獅子行關係亦源遠流長，歷任滙控（005）非執行董事，同香港上海滙豐銀行董事及副主席，但隨住年事已高，已先後於07年及05年中退任有關董事職務。
老竇曾倡夾錢租香港
近年蘇海文最惹爭議嘅一件事，莫過於六四事件後，出走美國嘅前新華社香港分社社長許家屯曾經透露，六四動搖了港人信心，當年作為商界翹楚嘅蘇海文，曾向佢提出，由香港商人出面，以100億港元續租香港10年，由港人自治，許氏提報告上呈中央後，俾港澳辦主任魯平面斥佢賣國。
許家屯仲話，當時問過蘇海文，「包先生（玉剛）知道不知道（建議）？」蘇未有答覆，佢估計包先生可能會知道咁話。
電郵：mailto:[email protected]