報紙紙價升到嘭嘭聲,八方收到風本地報販協會即將傾係咪加價。由明報企業、星洲媒體同南洋報業合併而成嘅世界華文媒體(685),公司執行董事張裘昌噚日話,香港報紙過去八年未加過價,近年通脹持續飆升,人工又貴,報販要求賣7蚊一份都好正常,加到8蚊就過份咗啲,始終要為讀者着想。至於《明報》會唔會加價,就視乎業界共識。
不過,張裘昌認為紙價現時已經升到頂,預料奧運後會回落,因紙張供應唔會咁緊張。目前集團旗下有5份報章同埋30份雜誌,每日報章發行量過百萬份,一年要買紙10萬噸。佢話集團會繼續擴充海外業務,《明報周刊》今年6月會進軍台灣,並計劃將大馬雜誌引進內地。至於近期喺三藩市同紐約推出免費報紙,佢透露前者已有錢賺,後者亦接近收支平衡,廣告收入相當理想喎。