環保大道一啲都唔環保，每次揸車返工都必定成車沙塵，好鬼入世！尤其係呢排梅雨天，濕度高，行親沙塵滾滾嘅環保大道，部車黐到成身泥塵認真火滾，咁唔好彩我鍾意高身四驅車，每次睇到高過自己嘅泥色車身就火到嚟埋，好彩有支清潔棍王MRCLEANSQUEEGEE，拖一嘢，簡簡單單就幫我擦番靚部車。
記者：梁美甜、王震遠
攝影：黃子偉、陳陶鈞
模特兒：Maggie（TheGroup）
四驅疾走
我不嬲鍾意揸四驅車，超跑就更加鍾意㖭喇，係無錢買唔起啫，四驅最得我歡心之處，係佢車身高腰線低視野開揚好睇位，尤其係ToyotaRAV4，讀書嗰陣已經好恨有一部。新一代RAV4外形設計同車身比以往大，內櫳空間增加20%有多，再唔係以往Corolla舊底盤，轉用新底盤搭配2公升VVT-i引擎，智能四驅都掂啫，開車時用四驅，巡航時用前驅，附設埋四驅鎖，整體表現有心有力之餘，最緊要係慳到油，慳到油咪即係慳到錢囉。
到真係坐上車揸番轉，嗰一刻嘅滿足感直頭瀉晒出嚟，不愧係四驅車，加上新一代搭配嘅智能四驅系統，車身會因應路面情況而自動調節。最正係操控容易，就算呢代嘅車身比上一代更大更長更闊，車架懸掛同引擎都調校得宜，軚感清晰，揸起嚟爽快利落，誇啲講句乜自信都返晒嚟，偏見又好，情有獨鍾都好，真係好開心！可恨公司喺將軍澳工業邨，返工放工都要行環保大道，部車出出入入，次次沙塵滿面，見到都心翳。
無懼梅雨
將軍澳工業邨日日有工程，加埋個垃圾堆填區，沙塵滾滾已經預咗，撞啱呢排梅雨季節，日日都落毛毛雨，濕度高，沙塵加水，部車日日玩變臉，日日泥漿浴。咁嘅環境，四驅就發揮到自己優點嘞，城市用四驅，車身Off-road功能反而係次要，高度On-road功能，喺路面行走識得隨機應變，行得更有效率，就算撞啱地盤爛路又或者水浸都即時反應到。就以返工必經嘅環保大道為例，車身高加上17吋輪胎比其他房車好得多，起碼唔會畀大大部泥頭車濺晒滿地泥濘上車身，部車扭力夠反應靈敏，避垃圾扭水氹話咁易啦。
ToyotaRAV42.0
引擎：1,998c.c.直4
馬力：152ps/6,000rpm
扭力：19.8kgm/4,000rpm
傳動：四前速自動波，智能四驅
尺碼：4,395×1,815×1,720mm
軸距：2,560mm
車重：1,505-1,570kg
查詢：皇冠汽車（23054555）
嚴選清潔棍王
養得車一定錫車，話晒都係二奶吖嘛，不過慘吖，香港路面大塵勁污穢，行一轉環保大道，二奶蒙塵焗住失色。或者你會話，洗車都係享受嘛，都啱嘅，不過洗極都唔亁淨就變咗難受呢。用「祝君早安」白毛巾抹車，效果認真麻麻，車都買得咯，咪慳啦，掟多兩個錢買把靚啲嘅清潔擦好過啦。清潔擦有海綿擦頭，吸水力點都強過毛巾，有埋支可伸縮嘅長柄方便洗埋車頂，擦頭又有埋軟膠可以洗玻璃……不過咁，支支清潔擦質素都唔同，知你懶，今日幫你做埋測試，買邊支，自己睇啦。
第一回合：鬥索……水
攞支大水喉起勢射二奶，好玩唔使郁，係爽呀，不過二奶濕𣲷𣲷，到要抹番亁佢又係攞命。今次測試最直接，逐支清潔擦浸入水桶，再出盡奶力揸番啲水出嚟，睇吓邊支最索水。結果1、2同6號拖頭Size差唔多，吸水量相若，3號明顯弱雞啲，得好少水，5號就中規中矩啦，4號最掂，吸到250ml水，贏幾個馬位。
第二回合：鬥捽……污迹
洗車最緊要亁淨，最慘都係落雨行環保大道，左一撻迹右一撻泥，揸到出觀塘已經俾人笑爆嘴。有啲渣貨清潔擦，污迹泥巴捽極唔甩，仲會越捽越污穢㖭，又係嗰句咪慳，一係唔買，要買就唔該買支Work嘅。今次測試用爽身粉當污迹，唔多，逐支清潔擦試捽一嘢，結果5號拖完仲有明顯粉迹，唔掂；2號、3號同6號留番條長粉痕，勉強合格啦；4號拖走到大部份污迹，1號最掂，一啲粉都無留低。
第三回合：鬥長……棍
洗車最辛苦一Part肯定係洗車頂，擒高擒低好辛苦，所以清潔擦支柄越長越Good。今次搵Maggie幫手抹車頂，1號同7號企喺地勉強抹到，2號要擔張凳仔幫拖，不過都好過4號，踩住車轆先搞得掂，3號呢？擔埋梯都搞唔掂。Maggie：「都係最長嗰支6號好。」單手搞掂，呢啲咪叫醒囉。
總結：
1號去污迹最強，棍身唔係最長但可伸縮方便收藏，揸上手好就手，仲有埋嚿軟膠可以刮水洗玻璃，價錢合理抵買。
a.聲威汽車用品音響公司
（旺角奶路臣街19號F地舖/27874716）
b.荃威汽車配件音響公司
（旺角奶路臣街19號G地舖/23932126）
c.實惠家居
（銅鑼灣怡和街1號香港大廈地庫/29237010）
d.嘉榮家居用品公司
（將軍澳尚德街市22-23號舖/21783727）
e.APITA
（鰂魚涌太古城道18號太古城中心2期/28850331）
f.JUSCO
（鰂魚涌康山道2號康怡廣場（南座）/28846888）