50幾年前大陸赤化，好多人怕咗江山一片「紅」走難嚟到香港，估唔到香港終於都要變色。聽日奧運聖火傳送大日子，高官權貴人人一身紅衣表態交心，民建聯想搶飲頭啖湯，趁噚日聖火抵港，多名議員搶先着一式一樣紅色衫去立法會開會博攞彩，點知着錯橙紅色衫，結果俾人笑佢哋色盲，民建聯落錯鞋油擦錯鞋，𤓓到爆。
蔣麗芸買錯疑似紅衫
顏色本來冇政治含意，衰在達官貴人話着紅色衫撐聖火，港府又拒絕「橙色運動」發起人、丹麥藝術家高志活（JensGalschiot）入境，令紅色成為愛國標準顏色，橙色忽然成為政治「禁色」。民建聯噚日𤓓着橙色衫，據講都係多得副主席蔣麗芸，佢負責去奧運贊助商adidas舖頭買衫，以為買正版正貨好穩陣，點知今次愛國遲咗一步，真正紅色嗰款俾人掃清，惟有退而求其次，買件疑似紅色衫頂檔。
成班人噚日着上呢件疑似紅衣出場，即刻俾人發現着錯衫，白鴿黨張文光話原來民建聯勾結外國勢力，撐「橙色」撐到上晒身，其他民主派議員都恥笑民建聯擦錯鞋。民建聯主席譚耀宗死撐，堅稱件衫喺adidas買，名為「腥紅色」，冇可能錯，陳鑑林好寸嘴咁話，張文光慣於顛倒黑白，指紅為橙唔出奇。
同陳鑑林冇乜偈傾嘅工聯會嫻姐唔抵得有人紅橙不分，直指民建聯件衫係橙色，事關嫻姐噚日着咗件真正紅衫，兩件衫比較吓就一目了然；大班就大鬧民建聯唔止黑白不分，連紅、橙都認唔出，懷疑成班人對眼有問題，建議佢哋驗吓有冇色盲。八方認為驗都冇用，左仔盲目愛國，患上政治色盲冇得醫。
民建聯劉江華仲有少少常「色」，承認件衫隻色有少少偏橙，又話橙、紅可以包容，着邊一隻色衫冇乜所謂。真係冇所謂？劉江華會唔會要求政府「包容」高志活，畀佢入境先？或者劉江華聽日着件橙色衫去迎聖火，睇吓有乜後果！
自由黨田少冇乜興趣玩呢啲顏色政治遊戲，佢話自己買架法拉利時，獲贈兩件「法拉利紅」T恤，聽日可能着呢件矜貴紅Tee湊熱鬧。如果真係越「紅」越愛國，陳太噚日着嗰件鮮紅色外套就最愛國嘞。
地產商要員工撐老闆
政客着紅衣以示效忠，富豪亦「染紅」表態，長江、新地、恒基嘅太子爺、老闆都有份做火炬手，幾間大公司都指示員工聽日着紅衣返工，部份員工要上街為做火炬手嘅老闆打氣，呢種愛國方「色」，香港獨有！
mailto:[email protected]