飽肚歸愛巢
馮仁昭四圍超：林韋辰、呂晶晶九肚山同居 - 馮仁昭

育有一女嘅亞視藝員林韋辰年前同台灣太太離婚後，同04年亞姐冠軍、25歲嘅呂晶晶火速撻着，至今不經不覺都拍咗兩年拖。
雖然林韋辰比女友年長近20歲，但相處冇代溝，感情仲越嚟越穩定，馮仁昭早排聽聞林韋辰搬離住開嘅紅磡區，原來佢同女友已經喺九肚山另築愛巢，享受二人世界。
前日朝早林韋辰同呂晶晶以情侶姿態去亞視大埔總台，出席奧運倒數宣傳活動，開完工，呂晶晶換過另一套衫，又同男友拍拖到九龍城地茂館消夜。

新居500萬

佢兩個坐喺全店最入嘅角落隱蔽位撐枱腳，嘆到凌晨近一點，由林韋辰負責埋單，同女友一齊離開。
當時林韋辰一馬當先推開玻璃門，尾隨嘅呂晶晶就保持距離，但過馬路時，呂晶晶都無視途人眼望望，主動蹺住男友強而有力嘅臂彎，一齊行去附近登上男方價值56萬嘅福士四驅車，直返九肚山晉名峰愛巢。
林韋辰同呂晶晶現居愛巢喺06年入伙，相當新淨企理，佢哋住喺高層單位，面積738呎，售價500萬左右，有會所、園林同泳池等，𠵱家時值夏天，睇嚟佢哋仲可以鴛鴦戲水㖭喎。