上星期隻門口衰狗（伯明翰）領先兩球都咬唔死利物浦，早飛又一次走盤，點算？冇嘞，唔好貪，簡單啲吼場熱W，捧保頓主場砌低已護級成功嘅「黑貓」新特蘭，攞救命3分。藍鑽石
保頓家陣排16位，只係多尾3嘅伯明翰1分，極危險，話晒煞科要作客仲有機會爭標嘅車路士，據講會方到時會請啲球迷去倫敦打氣，咁又點？真係畀保頓踢多兩個人都未必贏到。所以，今場應該係保頓搶分博唔駛降班嘅最後機會。除此之外，今場仲係今季最後一次喺銳步球場比賽，點都要贏番場向球迷交代。以往，英超隊主場煞科嘅勝率唔錯㗎。
新特蘭作客衰到貼
講近況，保頓其實一啲都唔失禮，4月中開始連贏韋斯咸、米杜士堡，上場作客熱刺都先入波最後被追平，3場攞到7分，試問近期有幾多隊做得到？賽前消息指，保頓早排整親隻手嘅射手奇雲戴維斯，仍因傷上陣成疑，但今場波事關重大，斷估佢紮住都會上陣。
貓果然有9條命，「黑貓」新特蘭上場以3:2險勝米杜士堡後，正式上岸；嗰場波，米杜士堡後衞普加廸斯完場前整球烏龍波，新特蘭球員諗番實笑到肚痛，話唔定𠵱家都未開完P。佢哋個個已經唞暑mood，戰意同保頓比肯定差天共地。斷估去到人家坐滿26,000人嘅地頭，唔會搞串人哋個party啩？
唔講戰意，新特蘭今季作客衰到貼，18場輸13場，只有打比郡作客輸波場數多過佢哋，梗係靠唔住；保頓，應該幫我早飛贏番鋪啩。睇對賽，保頓近4次主場對新特蘭1勝2和1負，冇優勢，但另一個啓示係4場都開細膽，同保頓近期旺「細」脗合，今場就博保頓W，補多個贏2:0嘅細膽。
早飛王貼士
星期六49保頓vs新特蘭
首選 保頓勝（1.6）
次選 保頓主/主（2.35）
冷選 保頓勝2:0（6.5）
《周末早飛超級重心》
「米堡」可以發「茅」
星期六30
米杜士堡vs樸茨茅夫2:0（7.5倍）
米杜士堡上場送份厚禮畀新特蘭，幫完人等於自己被拖落水，好彩最後兩場都有主場之利，唔死得晒。好似今場對樸茨茅夫，對方唔可以靠聯賽爭到個歐洲賽資格後，擺明將全副精力留番爭英足盃，同新特蘭一樣，應該唔會阻人發達。再講，首席門將占士因傷缺陣，後防穩定性至少打個8折。「米堡」只係有中場加利奧尼爾停賽，無相干。
紅軍出氣唔怕「曼」
星期日33
利物浦vs曼城4:2（50倍）
利物浦失意歐聯，今季最後目標就係喺主場煞科戰食尾糊，唔駛留力，估計啱啱踢完歐聯120分鐘激戰嘅主將，都未必完全被收起。曼城季尾易帥機會好高，領隊艾歷臣近期忙於搵後路，多過專心調兵遣將，曼城今場做硬出氣袋，輸少當贏。睇往績，利物浦近年主場煞科旺大波膽，今場雙方都放開懷抱，唔博大冷膽等幾時？
買「車」攻「紐」吼小勝
星期一5
紐卡素vs車路士1:2（7.5倍）
紐卡素表面上無目標，但領隊奇雲基瑾從來愛對強隊爭取好成績，證明自己仲係有料到。據講，雖然中場畢特再攞黃牌，就需要坐3場越季波監，但基瑾今場照樣會出佢，唔講得笑。不過，紐記想贏同贏唔贏到係另一回事，車仔士氣咁高漲，雙料冠軍夢未絕望，點計紐記應該都會力戰僅敗，宜吼車仔小勝開「和」，博埋2:1波膽。