天氣潮濕的日子，衫晾極都唔亁，人又特別易攰，最大件事是塊面變成包包面，小腿變成蘿蔔般粗壯……見到Angel，即時請教她有何方法可以減肥，「你唔使減肥，係水腫啫，等我教你煮幾味利尿去濕食譜同湯水，配合埋按摩和浸浴，試三日包你掂。」真係咁堅？我今日就試吓先！
記者：黃潔蓮
攝影：陳盛臣
示範：健康食療專家唐安麒
鳴謝：唐安麒美顏瘦身專門店
唐安麒Angel
現為唐安麒國際集團總裁，修讀香港大學中醫營養學及理工學院體重控制學，以健康食療專家形象示人。
五色蝦貝
0hr20min
份量﹕4人
五色菜除了顏色悅目，食得開心，還會對照五臟，有利健康。配了酸咪咪的奇異果，在這個初夏最醒胃。
材料
蝦仁10隻、帶子5粒、奇異果2個（切粒）、生菜1/4個、葱絲適量
醬汁：有機養生紅麴露或蠔油1茶匙、檸檬汁1湯匙、無味精清雞湯1罐、葡萄籽油1湯匙
做法
1.蝦仁及帶子以雞湯煮熟後撈起。
2.生菜切絲後鋪碟上。
3.開中小火加1湯匙葡萄籽油燒熱，加入紅麴露、葱絲及奇異果炒勻。
4.加入蝦仁及帶子炒勻約半分鐘，盛起後灑上檸檬汁即可。
李小姐問：水腫因為食得太鹹所致，但係煮餸又唔可以唔落鹽，會冇味嘛，有乜辦法呀？
答：食得鹽多有礙去水，其實可以用天然有機的紅麴露代替，加點檸檬汁也可吊出鮮味。
排毒肉翡翠
0hr50min
份量﹕4人
一聽個名就知道個顏色好翠綠好靚，苦瓜可以清熱解毒。
材料
苦瓜2條、免治豬肉1/2磅、葡萄籽油2湯匙
調味料：鹽1/3茶匙、糖1/4茶匙、有機黑豆豉油1湯匙、麻油/胡椒粉各少許、雞蛋白/生粉各1湯匙、水2湯匙
芡汁：有機養生紅麴露或蠔油11/2湯匙、水2/3杯、糖1/3茶匙、生粉1/2茶匙
做法
1.苦瓜去頭尾後切成環狀，並用湯匙挖去瓤。
2.免治豬肉加調味料，順着一個方向攪至有黏性。
3.把攪好的豬肉釀入苦瓜環內，排於碟上，以慢火蒸40分鐘。
4.以中小火燒熱2湯匙葡萄籽油，加入芡汁材料煮滾，淋在苦瓜上即成。
盧小姐問：揀邊種苦瓜好呢？
答：長苦瓜雖較雷公鑿苦，但個子修長，適合用來釀。
降脂消腫湯
2hr40min
份量﹕6人
紫菜有降脂作用，西芹可以祛濕利水，用來煲湯可以健美瘦身兼消腫。
材料
紫菜5錢、西芹4両、紅蘿蔔1個、排骨1斤、鹽少許、薑1片
做法
1.西芹洗淨切段、紅蘿蔔洗淨去皮切塊。
2.排骨洗淨，放滾水中加入薑片汆淨血水。
3.煮滾一鍋水，放入紅蘿蔔及排骨，先以大火煮10分鐘，再轉細火煮2小時，加入紫菜及西芹再煮30分鐘，加鹽調味即成。
許小姐問：那種紫菜適合用來煲湯？日本和韓國的即食紫菜可以嗎？
答：只可用天然不加入任何添加劑的紫菜才可用來煲湯，即食紫菜含鹽太高。
祛濕冬瓜水
2hr10min
份量﹕6人
懶得自己逐一去執材料，去藥材舖買一包祛濕茶，就已經有齊各種材料，再加埋冬瓜及粟米一齊去煲，味道就會更甜。
材料
赤小豆/生薏仁/扁豆/葛根/芡實/玉竹各1両、陳皮2片、蜜棗2粒、冬瓜1斤（連皮連籽）、粟米1條
做法
1.赤小豆、生薏仁、扁豆、葛根、芡實、玉竹及蜜棗等洗淨。果皮浸軟刮瓤備用。
2.冬瓜去瓤後洗淨切件。粟米去衣後切開4件。
3.將所有材料放入煲內，用6碗水煲2小時後即可飲用。
鄭小姐問：呢個湯水係咪甜食呢？加冰糖、片糖定係黃糖會好啲呀？
答：我唔建議落糖，始終食得糖多冇益，靠蜜棗及粟米可以帶出淡淡甜味。若嫌唔夠，可以加埋紅蘿蔔去煲，會好清甜。
Angel建議7日去水腫餐單
早餐：蔬菜＋生果任食
午餐：（星期一、三、五、日）降脂消腫湯＋五色蝦貝；（星期二、四、六）降脂消腫湯＋排毒肉翡翠
晚餐：澱粉（如飯及麵等）＋蔬菜任食
另每天飲祛濕冬瓜水2至3碗，亦可加浸浴，在水中加鹽4湯匙及米酒1/2樽。月經後兩日進行這餐單加浸浴，體重減得更快。
網上重溫
http://cooking.appledaily.com