火炬手之位，上榜的都是政商權貴，香港單車隊前代表洪松蔭、首位為香港奪得亞運金牌的車菊紅、輪椅運動員張偉良卻榜上無名，有巿民去年底獲邀為火炬手，但最後拒絕，「我唔理得人哋點樣分餅仔，但呢啲光，我哋唔應該叨。」
「班闊佬做乜同人爭」
關女士的女兒今年25歲，因成績優異，又參加過交流活動，去年8月獲通知被推薦為火炬手，她問女兒：「你對體育界有乜嘢貢獻先？冇就唔應該去囉！」「好多家長會覺得咁樣好光榮，但係我唔覺得，佢只係代表過學校打排球。」
「香港運動員一定唔止120人，就算冇攞過獎，都付出過汗水，為體育界出過一分力，唔係話我哋呢啲人讀書好啲就可以去。」關女士與女兒商量後，決定放棄推薦，至昨日看到政府公佈的名單，大吃一驚，致電商台節目表達意見。
「邊個曾光呀？真係無厘頭，講真，嗰班闊佬做乜仲同人爭呢？應該讓畀啲後生，咁先叫做長者風範，胡錦濤會唔會同人爭做火炬手吖？」
對於丹麥雕塑家高志活被拒入境，她感不忿：「香港係國際大都會嚟㗎，收人（手提）電話呢啲行為係共產黨先會做……佢有乜唔妥嘅，你一隻手指都捽死佢啦。」她上月初到英國倫敦旅行時曾直擊聖火傳送儀式，「嗰度好自由，啲警察由得你嗌，如果香港好似越南、北韓咁，冇人示威，你就驚喇！」她說聖火傳遞當日會穿全黑，「我冇橙色衫咋，但我會着全黑衫，係送喪我至會咁着。我唔係唔支持奧運，但唔好搞得咁肉酸，叫啲人唔好晾衫出街，簡直不知民間疾苦，𠵱家梅雨天時呀，啲衫晾喺出面都難亁啦，何況晾入屋！香港好多人間屋都係得幾百呎，你叫人晾去邊啫？」
車菊紅：很政治化
洪松蔭指，火炬手缺乏退役運動員參與，而車菊紅份量足以成為火炬手，他不介意自己未被選中，「身邊好多朋友都以為我係……我已經當咗自己係火炬手。」
車菊紅表示，火炬手名單很政治化，運動員數目比例太少，她認為娛樂界配額是否應該撥給體育界。她不明白自己為甚麼不在名單，但沒有不舒服感覺，因為她曾在冬季奧運會擔任火炬手。
記者：張嘉雯