奧運聖火喺香港傳送之後，下一站就送到澳門，唔使問都知，賭王何鴻燊一定有份做火炬手，星期六喺澳門傳聖火。賭王今年86歲，大過香港最老火炬手74歲嘅曾憲梓12年，八方噚日問賭王有冇操練吓，佢自詡狀態好fit，仲明寸有啲「跑手」名不副實，「我唔同曾憲梓要坐輪椅！」
曾憲梓出入都要人扶住，賭王則健步如飛，喺《北京奧運倒數100天》大騷中，同四太梁安琪表演跳舞，兩人噚日去紅館綵排。賭王喺澳門傳聖火，佢乖女超瓊就係香港代表，佢話梗係戥個女開心同光榮，「超瓊佢咁後生，連我自己都唔使準備啦，一陣間我表演跳舞㖭！」
撐超瓊夠資格
香港火炬手名單備受爭議，賭王話超瓊夠晒資格，至於澳門火炬手人選，賭王話本來澳門都應該由運動員負責第一棒同最尾一棒，可惜澳門未有李麗珊同黃金寶呢啲金牌運動員，所以要將就吓。佢又話暫時未知自己跑邊一棒，一切待大會安排，「總之身為中國人，有份參與今次盛事，已經好驕傲。」