今日全城迎奧運火炬，勢必轟動。有心人蘇澤光（JackSo）身為貿發局主席，發動各大機構鼓勵員工今日穿着紅衣上班，以示支持京奧。有人認為一啲商界高層如此激動熱情，愛國不甘後人，必然一呼百應，構成偉大場面。不過如果做得更徹底一啲，讓香港志願福利團體得番一啲jetso，不如就請各大財團機構，首先由貿發局做起，今日齊齊貢獻公益金，凡有一位員工穿着紅衣上班，公司就捐一百蚊畀公益金，又或者在一百蚊之中，扣五十蚊嚟捐畀傷健策騎協會，與馬術總會，協助佢地買馬畀選手參加奧運馬術賽。愛國唔係冇代價㗎，貿發局，港鐵，新鴻基等等有大把錢，趁支持京奧之便，捐番啲又何妨？何鴻燊隻馬「爆冷」在「愛彼錶女皇盃」大賽跑第三，有啲失望，但佢都立即捐出第三名獎金共一百五十萬元畀奧運馬術啦！
今日沙田馬場（十二時至三時）有迎火炬盛事，馬場七樓有自助餐，每位為二百多元，一早要訂位，四月二十六日就截止咗。點解要咁早呢，因為警方緊張過緊張，要馬會交齊所有訂位會員名單，唔知到時會唔會對埋身份證先至准食自助餐呢？李少光身負重責，入境處與警察焉敢不「超全力以赴」吖。
今年京奧火炬傳遞，因三月發生西藏事件，搞出個大頭佛，火炬沸沸揚揚，到處觸動保安人員神經，卒之嚟到香港嘞，應該冇事嘅。《時代》雜誌今期有篇法國人（DominiqueMoisi法國國際關係學院資深顧問）寫嘅文章，題為「失面子，還是失合約？」就講到中國今天財雄勢大，向法國買入大量貨品，雙方簽訂了大批交易合約，所以中國搵法國嚟出出氣，確實搵啱對象。法國商界大力向薩爾科齊總統施壓，後者焉敢不從？故此立即派遣特使去北京叩頭。呢位Moisi先生幾風趣，引用當年史太林蔑視教宗之言：「ThePope?Howmanydivisionshashegot!」（教宗？佢有幾多師呀！）改寫為DaliLama?Howmanycontracts?（達賴喇嘛？佢有幾多張合約？）達賴當然冇合約可以同法國簽，故此法國政府點會同達賴講人權呀。