5月2號奧運聖火就嚟到香港，做生意嘅商家都爭住發聖火財，體現吓香港人嘅𢱑銀精神。首先係商場爭相借聖火到港搞活動，銀行業界又以中銀香港（2388）最積極，喺總部樓下開專賣北京奧運特許商品嘅旗艦店，噚日仲搵中銀香港副董事長兼總裁和廣北出席開幕儀式。
中環中銀總行地面，畫咗一邊位置畀「北京2008年奧運會特許商品旗艦店（香港）」，和廣北對店內賣嘅產品，好似俗稱鳥巢嘅國家體育場純銀擺件等好有興趣，但對人人趨之若鶩嘅火炬，佢似乎反應麻麻。
當港協暨奧委會會長霍震霆帶和廣北參觀迷你版祥雲火炬時叫和總拎吓，佢免為其難先肯揸住，唔知係咪怕有反對者嚟搶？後尾華華問佢會唔會傳聖火，佢亦冇回應。似乎火炬係好好嘅做生財「工具」，但咪隨便接囉。
咁用火炬搵錢掂唔掂？噚日三間大發展商公佈，聖火在港傳送期間會有活動。恒地及信和旗下商場，會喺下個月2號播放聖火抵埗嘅過程，叫大家着埋紅色裝束嚟商場支持。至於MTR商場亦接力喺6月下旬喺紐約請奧運珍藏家，帶埋過千件奧運珍藏品嚟香港巡迴展覽。咁你話聖火係咪財神吖？
電郵：mailto:[email protected]