前星期某日大編輯在健威花園停車場泊低架車，左手揸住手機，行入商場，十五分鐘之後，發覺手機唔見咗，點會呢？想來想去，只有一個可能，就係曾經停在某舖頭櫥窗前，睇咗一陣，當時好似係將手機放入西裝袋裏面。大編輯回到商場行過嘅地方，遍尋手機不獲，唯有去警局報警，預防有扒手偷手機之後，用來作犯罪用途也。唔見手機係小事，大事係機內有幾百個朋友、同事嘅電話號碼，有排先至可以輸入新手機。
聽完大編輯講失機故事，編輯L又打電話嚟通知：「喂，我上星期三晚在電訊大樓下面被打劫。銀紙唔見咗幾百蚊啫，但身份證及其他證件以及手機、信用卡冇晒，好鬼煩。通知你一聲係驚住啲賊人知道你個手機號碼之後，打畀你白撞行騙，請你小心。」編輯L現在嘅正職係賣投資產品，畀now搵咗做兼職監製一個投資節目，晚上十一時許收工後，一個人行出now所在地──灣仔警署對面嘅電訊大樓，就在高士打道天橋附近被一個男人手持疑似利刀嘅武器指住個頭，要佢交出手袋。編輯L一介女流，素來斯文過人，當然唔敢嗌（嗰度晚上冇乜人，汽車就多，叫聲會被車聲遮蓋）。事後立即走上天橋，行入對面嘅灣仔警署報警。編輯L仲好好心咁講：「左先生，以後唔好一個人喺深夜路過電訊大樓呀！」左丁山梗係唔會啦，但now有好多新聞小花喎，佢哋深夜放工點搞？燦哥要諗諗佢。
香港治安向來幾好，但唔起眼嘅打劫案件好似日日都有，扑頭黨尤其害人，在僻靜地方行夜街都係小心為上。希望晚上罪案唔好失控呀，以免傷害香港聲譽。一位外交官朋友以前係駐華盛頓，當地罪案頻生，佢嚴禁兩位未夠二十歲嘅仔女晚上出街，仔女當然悶到喊，好唔高興。調嚟香港之後，外交官仔女幾乎第一時間衝落蘭桂坊，晚上各自行動，外交官最初有啲擔心，住落幾個月，猛讚香港地鐵亁淨安全，夜晚乘搭都唔使驚，話已經完全取消咗對仔女嘅「宵禁」，因為香港確實係安全地區也。但望香港呢個安全聲譽可以繼續保持！