馬時亨局長去咗曼谷與泰國商務部長兼副總理會晤，得到泰方承諾，泰國每年供港白米三十萬公噸，不會有變，原來佢去曼谷係出席亞太經濟合作組織電信和信息部長會議，佢識得玩政治，乘機拜會泰國副總理講食米，返港又可向曾特首邀一功。
算命先生經常講時也命也，鬼佬就講在適當的時間在適當的地方出現，馬局長真係時運亨通，唔做財經事務及庫務局局長，改任商務及經濟發展局局長，開正佢嗰瓣。你睇陳家強局長𠵱家幾靜局？馬局長轉咗職位，就忙個不休。以前食米供應無風無浪，我哋穩食太平糧，點知今年白米成為新聞頭條，連美國沃爾瑪都要限制賣米，你話係乜嘢世界？於是馬局長就有得發揮啦。佢係潮州人，泰國啲米商係潮州人，香港啲入口米商又係潮州人，全部自己友，講米好易講啫。路透社曼谷新聞（四月二十五日）話泰國出口米商三十幾人定期吃午飯，商討米價，全世界受影響，而呢班米商全部係潮州人噃，想買米買得到呀，講潮州話易傾啲，你話馬時亨係唔係在適當時間在適當地方出現呢？左丁山唔知佢識唔識講潮州話，如果唔識，請佢快啲補課。
當今糧食世界大亂，巴西、埃及、印尼禁止食米出口，日本就乘機話泰國米太貴（泰國要價一千三百美元一噸），禁止買米入口，反正日本有足夠貴米也。香港一年入口食米三十三萬噸，泰國佔咗九成，商務部長既應承每年供應香港三十萬噸，夠晒啦，大家唔使去超市搶米，而價錢就一定係貴啲㗎嘞，冇得好講，香港只求有米供應啫，冇條件同人講價，你睇吓，菲律賓向國際招標，求買五十萬噸食米，結果買唔夠三十三萬噸呀，而買入平均價比三月時高出百分之四十幾。
米貴嘅原因有幾個，人口多咗，中國印度有錢咗，耕地少咗，全部係舊理由。新理由就係biofuel（生物燃料），玻利維亞、秘魯總統要求停止提煉生物燃料，巴西總統就堅決主張發展生物燃料，歐盟、英國、美國繼續大量津貼生物燃料生產，聯合國官員JeanZiegler就話生產生物燃料係acrimeagainsthumanity。國際間辯論得咁激烈，大家唔使跟風講環保用生物燃料住。