中銀信用卡（國際）兼中銀旅遊總經理蘇誠信（圖）好鍾意運動，佢上年就代表中銀參加過慈善高爾夫球賽，華華噚日喺中銀嘅奧運特許商品旗艦店見到佢，問佢有冇奧運開幕嘅入場券，佢笑笑口話仲努力緊（去搵）喎。
華華見佢睇精品睇得好投入，問佢有乜心水，佢話其實已經訂購咗迷你版「火舞祥雲」奧運火炬、嵌咗藍色仿水晶嘅水立方1比1000比例模型，同埋包括一金三銀嘅馬術項目紀念銀章。
三樣嘢佢似乎最鍾意馬術金幣同銀幣，佢話因為金價升得勁，而北京奧運又有紀念價值，所以有收藏兼投資價值，又話啲定價早喺上年尾時，北京奧組委已經決定咗，全套一金三銀幣賣4180港銀，但家陣啲金價都升晒，佢講笑話要提議加吓價先得。