金管局總裁任志剛除咗係一個財金官員，喺華華心中，佢仲係一位預言家，由於佢一向「居安思危」，所以佢嘅預言通常都同當時大形勢唱反調，就好似呢排個個都唱好人民幣升硬，佢就一盆冷水潑落嚟，話驚人仔滙價「短期會有周期性改變唔奇」。
至於任總嘅預言準唔準？舊年底，任總喺北京隔空發「盈警」，話持有次按投資嘅個別銀行，今年業績「見紅」都唔出奇（留意！佢都係用「唔奇」、「唔出奇」之類嘅字眼）。
由於各大銀行出嘅都係07年度嘅業績，舊年個個都仲係賺到盤滿砵滿，至於公佈咗今年首季業績嘅中行（3988）賺217億人仔、建行（939）就賺321億人仔、招行（3968）賺63億人仔，至於其他銀行會唔會應咗任總嘅預言，暫時仲未知，不過，由於港股首季表現一個字講晒──慘，所以外滙基金投資「率先」見紅，應驗咗任總嘅預言。首季賬面蝕咗百幾億銀，外滙基金係三年嚟首次見紅。不過，任總話，相信4月份應該可以收復失地喎。
好嘅唔靈醜嘅靈
究竟任總係咪因為計過自己盤數，將心比己，所以有「見紅」預言呢？華華唔知，不過，話要說回來，銀行公佈嘅都係07年度業績，但外滙基金剛啱公佈嘅係首季業績。只係預測嘅嘢，有時真係唔好講得咁盡，尤其係負面嘅預言，「好嘅唔靈醜嘅靈」唔緊要，最衰係醜嘅唔係應驗喺人哋身上，而係自己受晒。
電郵：mailto:[email protected]