民意調查：除了不甘受辱憤而報警的司機甲和乙，你認為港九數以千計的計程車駕駛者當中，會不會起碼有一個唔聲唔聲甘之如飴的司機丙？不要那麼悲觀，給我肯定的答案！或者，他就是剛剛放你在街尾落車，滿口煙屎牙兼不停問候別人老母的麻甩佬！
這種聳人聽聞的危言，不免令你一陣反胃：唔會啩，睇起嚟普通人一個噃，找錢時我見佢左手無名指仲好似戴住隻戒指㖭，點會係嗰啲人唧。坦白告訴你，「基佬有樣睇」這種成見，以前我亦深信不疑，自以為金睛火眼，十萬八千里外就聞到異味。但凡姨媽姑姐盛讚某某世侄「白白淨淨斯斯文文」，我的嘴角便陰濕浮起微笑，這個博盡老人家歡心的聽話俏後生，唔使審必定是姐姐仔。健身房特別姿整的大塊肌肉男，快手快腳脫下艷色滾白邊aussieBum內褲的時候，不忘向鏡中自己繃緊的八月十五飛一個眼風，光天化日撞啱這樣一朵水仙花，就算阿貴殷勤等待供給答案，我都費事嘥口水多此一問。還有那個出奇友善的洗頭仔，花鋪不厭其煩把一打玫瑰修剪到齊一齊的老闆，銀行櫃面高貴地數銀紙的冷面小生，鶯聲嚦嚦的午夜電台DJ，蛇竇裏CK2香到過隔籬的文員，我都貿貿然當他們推心置腹的同道中人，在同一條船上乘風破浪的自己友。偏見直至數年前，有幸光顧過街坊聯誼會格局的同志浴室，方才徹底消除。奉勸斷言「佢有老婆唔可能係同性戀者」的法官，還有揚言香港缺乏基佬親嘴摸屁股場合的辯護律師，攜手到這些地方考察考察，貼身體驗對對碰生涯，除了增長專業知識，說不定還會對自己日漸麻木的臭皮囊有新發現呢。