數碼通（315）早前撈埋家居電話服務，擺明車馬要同電盈（008）爭固網電話客仔，喺香港呢個自由市場，競爭當然在所難免，大家本嚟相安無事，按慣例都係登廣告sell吓自己嘅服務啫，點知8號仔一個「精明消費．免被誤導」嘅廣告，就辣着咗數碼通，數記有幾不滿？噚日去信電管局嗰度投訴囉。
數碼通CEO黎大鈞講，8號仔喺廣告標明「即使遇上颱風、節日等情況，用量突然飆升，網絡依然保持穩定」，跟手黎生攞份剪報（間埋字嗰隻）話，有報道舊年8月颱風「帕布」襲港時，固網同手機網絡都擠塞，黎生直斥廣告有誤導成份。
電管局方面話已經收到投訴，會積極跟進，至於俾人投訴嘅電盈就冇回應。