從古到今，好多國與國之間嘅無謂爭端，都係因為利慾薰心造成，尤其為咗打倒敵對鄰國、繼而想稱霸世界就更加唔使講，但求目的不惜生靈塗炭。世嘉最近喺PS3推出嘅《戰場女戰神》亦不遑多讓，咪睇佢畫面幾別致，其實要令呢班與世無爭嘅少男少女重拾和平，玩家必須手腦並用，力抗所有不懷好意外來者。除咗要應付火槍同坦克外，仲有屈機到爆嘅長槍女戰神，真係食腦少啲都搞唔掂。
文：陳福榮
虛構三十年代歐陸色彩
《戰場女戰神》個世界觀係以二十世紀三十年代嘅歐洲作為藍本，再加以幻想式元素修改而成，講述西面聯邦軍與東面帝國軍，為爭奪擁有奇妙能力嘅藍色能量Ragnite而打仗，結果令位於雙方交接地帶嘅細小加利亞公國無辜受到牽連。女主角雅莉絲亞愛好和平，但眼見家園戰火連天，死傷無數，於是聯同青梅竹馬男主角韋堅踏足無情戰場，成為義勇軍第七小隊嘅重要骨幹。本作令人印象深刻，唔講玩法同系統呢啲要花時間感受嘅元素，最明顯當然係嗰種極有美術色彩嘅淡淡然水彩畫風，就算技術層面未必勁揪得過啲3DGame，單論創意絕對及得上舊年Capcom嗰隻《大神》。
兼營佈陣加動作
標榜住ActiveSRPG玩法嘅呢款新作，就咁睇以為係《RainbowSix》嗰種第三身任務射擊，但又見佢要佈陣同計行動值（CP），仲有過關前後嘅對話部份，諗諗吓都有啲似同屬世嘉嘅《櫻花大戰》。如果要講《女戰神》嘅實際玩法，可以睇成有動作成份嘅戰棋，首先要喺類似《R6》嘅整個版圖決定每個士兵嘅行動方向，當喺玩家回合你要妥善行每步棋，在有限行動次數內盡量做晒靠近敵人同開火攻擊等動作，最好唔畀對方有還擊機會，否則敵眾我寡，你仲要扮Rambo咁就實死冇生，想留住小命最好鬼祟玩偷襲或孖埋同伴玩夾擊，總之大前提係增加火力兼減輕被伏擊機會。
爭能源鬥屈機女神
點解講到啲藍色能量咁把炮？事關除咗能夠作為坦克車嘅推進動力，以及令投擲用手榴彈威力更強之外，其實補給兵都係借助佢哋嚟幫受傷士兵補血，難怪帝國軍死都要搶盡所有Ragnite啦。唔單止咁，如果你以為幾支炮管嘅戰車已經好勁，咁就一定要見識帝國軍女指揮官斯庇莉亞進化成女戰神嗰個款，因為左手盾右手長槍，連炮彈都可以打番轉頭，加埋曉得高速滑行，威力絕對誇張過慢吞吞嘅戰車好多倍。咁只係人類嘅男女主角又點算？當然要靠每關之間嘅升級功能，將武器同戰車逐步增加威力，仲有睇準機會發動命令指令，作出影響戰局嘅不同效果，咁都仲有機會以小勝大。
屬性互剋睇準至郁
隻Game主要分為士兵、戰車同對戰車兵呢三個不同兵種，各有優缺點善用就可以遇神殺神，反之寸步難行。士兵包含咗偵察兵、狙擊兵和補給兵等，雖然各有特性但面對住對戰車兵最有着數！對戰車兵顧名思義係針對戰車而設，戰車則可以好快速咁解決士兵，令呢三個單位形成包、剪、囗嘅相剋關係，大家要記緊搵最啱用兵種出擊。
本作品糅合好多唔同類型玩法在內，漸漸多人察覺佢係正嘢。因此喺無行貨嘅情況下，普通版企硬四百幾蚊唔跌，附送超多珍貴贈品嘅特別版則標價近千都被搶晒，即使友情價亦冇乜可能平過九嚿，今時今日算好賣！
機種：PS3
廠商：SEGA
類型：SLG/ACT
人數：1人
日期：發售中
售價：$450
