馮仁昭四圍超：
闔家嘆越南餐　李彩華揸新車唔預父母 - 馮仁昭

早幾日先至俾人發現翻撻「變靚D」老闆蕭定一嘅李彩華（Rain），最近除咗幫亞視為佢有份擔正嘅新劇《火蝴蝶》宣傳之外，都好鬼得閒。繼上個星期六，阿Rain同前緋聞男友蕭定一喺觀塘apm睇戲之後，前日下晝見佢約埋阿爸、阿媽同埋細佬一齊食越南菜，共享天倫之樂。

坐喺角落位置

前日下晝大概5點鐘度，馮仁昭發現戴住cap帽同埋黑超嘅阿Rain，同屋企人喺大坑浣紗街嘅火車頭越南餐室食緊嘢，而呢間餐室嘅老闆，綽號叫「火車頭」，咪就係之前同陳伶俐傳過緋聞嗰個囉！阿Rain一家坐咗喺角落位置，不時頭dupdup好似好避忌咁，佢哋食到大約5點15分左右就齊齊離開。

接載細佬一個

之後阿Rain行咗去門口咪錶位攞車，一路行仲一路嘴郁郁，好似好回味啲嘢食咁款。後來見阿Rain開車門，先至知道佢原來出咗部粉紅色嘅開篷甲蟲車，車款得意之餘，顏色又可愛，絕對適合好似阿Rain呢種少女揸，不過奇就奇在阿Rain揸住部新車，只係打算接載細佬一個，至於佢父母就要自己搭車離開，又會咁嘅！