薪火相傳
奧運風帆奪金運動員
李麗珊：「好興奮做第一棒，而將參加奧運嘅黃金寶做最後一棒，有薪火相傳意義；我覺得120名火炬手來自不同界別，更代表整個香港。」
憂聖火熄
游泳選手
施幸余：「好榮幸選到我喺龍舟咁特別嘅海路，而且係最長嘅一棒（約8分鐘），我冇坐過龍舟，少少擔心會好浮或者風太大會整熄聖火。」
機會難得
輪椅劍擊運動員
余翠怡：「我平時都係行路多，今次跑100多米唔會難倒我，我覺得比喺上屆奧運奪金更難得，奧運四年一次，喺香港傳聖火係更難得嘅機會。」
保護火炬
最年輕火炬手
趙頌熙：「3月10日啱啱滿14歲，可以參加火炬跑，開心程度同上年同國家主席胡錦濤一齊打乒乓波一樣，若果有人搶火炬，會立刻整熄，收埋佢。」
唔怕示威
「星之子」
科大生陳易希：「我唔怕會成為示威者搶火炬嘅目標，到時我會跑沙田，我諗大會揀中我，一定有佢嘅reason（理由）。」
練舉啞鈴
恒生商學院院長
崔康常：「我一向都有做開運動。火炬棒大約重兩磅，我𠵱家日日都有練舉五磅重啞鈴，到時足以應付傳送火炬嘅路程。」
睡充足點
07年中華小姐
環球大賽總冠軍曾光：「我覺得很高興，會睡得充足點，作為傳聖火的準備。我想，可能是我曾在香港參加選美比賽，所以能成為香港的火炬手。」
有人保護
立法會主席
范徐麗泰：「好榮幸做到火炬手，唔擔心有示威，因為有好多人喺現場保護，而且香港人都係好守法嘅，希望可以宣傳到奧運嘅和平訊息。」
游水練氣
長實集團副主席
李澤鉅：「唔清楚點解會揀中自己，成份名單商界代表太少。心情好興奮，有游水練氣，唔擔心保安問題，對警察有信心，唔需要保鑣陪跑。」
火炬留念
恒基兆業副主席
李家傑：「我平時都有練跑步，都唔係太清楚點解會被選中，覺得好榮幸，希望快啲可以將支火炬拎返屋企留念。」
