專門做中國彩票遊戲系統嘅華彩控股（8161），噚日喺灣仔萬麗海景酒店開股東大會，點知咁啱得咁蹺，所有客𨋢都壞咗，搞到主席陳城同埋副總裁廖元煌要走後門坐貨𨋢，先可以準時現身主持大局。
陳城一向好低調，噚日佢太太──即係公司副主席兼總裁劉婷，因公事飛咗去北京，得番陳城一支公撐場，佢更加唔多講嘢。散會之後，佢亦秉成一貫低調到暈嘅作風，同華華交換咗張卡片，想話同佢影吓相，訪問兩句，佢都耍手擰頭，跟住就閃咗。
講番華彩，01年上市時，仲係叫金屬電子交易所，後嚟拍到澳洲上市公司Tabcorp合組TIHK，仲攞埋大陸「中彩在線」獨家合作協議，成為最早變身中國彩票股嘅上市公司。雖然咁多新聞，但陳城同劉婷就相當低調。雖然喺股東會唔可以見多陳主席一面，但聽聞陳主席不時會一個人喺太古廣場行街，有心搵佢，不妨試吓喺嗰度撞吓。