有橋王稱號嘅陳祖澤，喺載通國際（062）做董事長唔經唔覺已經10年有多，佢剛啱先喺今個月7號退休，接任人選仲未公佈，但載通07年年報就出咗，陳祖澤07年度董事袍金、薪津、花紅加埋退休金供款一共攞到731萬銀，由於年報只係反映舊年𢭃幾多，所以仲未知佢有幾多退休金。
已逐步接棒嘅何達文，喺07年已擔任九巴同龍運嘅董事總經理，睇番年報，佢07年就𢭃咗506.6萬銀，加咗41%，當中加得最多係酌情花紅，多咗幾近百萬銀，袋138萬。今個月橋王退休嗰日，何達文就做咗載通嘅董事總經理，有理由相信佢08年人工會更上一層樓。
不過載通高層當中，加得最多嗰個唔係何達文，而係搞推廣有一手嘅女將、執行董事伍穎梅，伍小姐07年人工加咗43.6%，共袋453.7萬銀。當中嘅薪津有315.9萬銀，仲多過何達文嘅296.4萬銀。