資金輪流炒，辣到去股仔，渝港（613）臨尾三個交易日，都過30球成交，聞到有鑊氣，要買當頭起。渝港揸住內房股中渝置地（1224）2.54億股，後邊中渝最新造9.1元，渝港揸住中渝權益等值23億銀，唔係嘢少。計計數，渝港應佔中渝市值，等於渝港每股0.25元，係渝港現價（0.15元）1.6倍。呢撼貨為渝港帶嚟嘅變現潛力，極之豐厚。
又渝港最新NAV0.55元，折讓上到72.7%，炒折讓，亦口水流。要咁睇，渝港NAV增值，亦係得力於中渝，所以，就算渝港揸實中渝唔放，亦一樣受惠中渝股價上漲，家底水漲船高。
再講，股仔好似世城（355）同麗展（488），喺對上星期五，以大成交搶上近個半月新高。資金辣到去股仔，而渝港成交先行，但仲企喺1年低位，好抵炒。係咁意渝港折讓60%做目標，講緊都要升46%到0.22元。
達成折讓大有得諗
達成（126）1年高位3.97元，股價撻咗近70%，現價（1.26元）仲喺1年低位載浮載沉，內房概念股當中，達成仲未認真反彈，有得諗。達成最新NAV兩蚊，現價折讓37%，折讓唔太誇張，但連埋呢期拓展嘅內房業務，連資產重秤因素，達成實際NAV起碼上到2.65元，折讓52%，呢個折讓水位，已經夠照。短打博達成上到近100日線1.5元，NAV折讓仲講緊上43%，但回報率已經19%，有魚有肉。