「疑似特首候選人」梁振英（CY）近日快馬加鞭，日前公開炮轟工資保障運動冇料到，噚日再出招，出席TVB節目《一百萬人的故事．全民開講》，同公民黨張超雄、工聯會嫻姐等基層「救星」，與200幾個天水圍、屯門、深水埗基層市民講貧窮問題。
TVB做販賣悲情節目冇欺場，落足力煽情，搵到個現職政府外判合約清潔工阿英現身陳情。阿英指早前被減人工，時薪由23蚊減至21.5元，職位改為廁所事務員，唔受「清潔工」最低工資保障，公司擺明賤招剝削。
聲稱幫清潔工出頭
聽到阿英講到咁凄凉，CY拍心口叫佢唔使驚，「如果你（阿英）喺下個禮拜之內，你老闆唔恢復番你原來嘅人工，你下個禮拜打電話搵我。」全場苦情打工仔聽到行會召集人肯幫佢哋出頭，即時拍爛手掌。八方印象中，未聽過咁多人畀掌聲CY，場面幾詭異。
CY一言既出，唔知其他低收入人士會唔會蜂擁而至，搵佢對付無良僱主，屆時CY可能要開多個地區辦事處先接得晒啲cases。2012特首選舉啱啱開跑，CY已經積極搶韁，相信博取掌聲期票陸續有來。