一位青年才俊突然間用真姓名在報紙上寫稿，寫專欄，畀退休大編輯留意到。佢素來心水清，立即講：「此君一定出馬競選立法會議員。以前佢寫稿用晒筆名，聲稱要保守秘密，以免影響佢嘅工作，𠵱家點會突然轉晒作風呀？如果佢唔出來競選，你問我！」
青年才俊肯投身搞政治，可喜可賀，馬丁李既然話要退休，細佢三十餘年嘅才俊躍躍欲試，啱時候嘞。之不過，參選還參選，寫稿還寫稿，寫得太多，會自暴其短，反為不美，正如奧巴馬咁，初時驚為天人，但在希拉莉死纏爛打之下，已漸露原形，就係得個講字，講就天下無敵，他日做成總統，好可能有心無力，起碼至今佢仲未有一套具體政策講到出嚟！我哋睇青年才俊寫稿，有時睇到一嚿雲，唔知佢嘅主旨究竟係乜，或者自己已經out咗都未定。
編輯W二十年前風華正茂，人又靚仔，一心夢想做yuppies，係咁使錢，風流快活。二十年後，有老婆仔、有車仔、有樓仔，冇得風流咯，但偶然回味以前生活，仍然覺得幾開心。佢睇才俊寫八十年代yuppies，打電話問左丁山：「呢位才俊今年幾多歲呀？」左丁山唔知，問退休大編輯，大編輯話：「三十幾四十啦，應該未有四十歲。」如是告知編輯W，編輯W立即話：「唓，咁講法，八十年代之時，才俊先至讀緊初中至高中，點有yuppies嘅生活體驗呀，人云亦云啫，唔怪得我都睇唔明。」有云少年不知愁滋味，為賦新詞強說愁，今有三十零歲才俊寫八十年代文華酒店酒吧之事，難道是為求競選強扮老？
講文華酒店酒吧之逸事，要搵前議員發叔或者唯靈講至得。發叔嗰陣時常在下午及黃昏時間去文華酒吧打躉，左丁山一輩則忙到周圍飛，只會偶然去吓，人哋話我哋係yuppies，自己就不知yuppies生活為何物，日日掛住做，個個禮拜在不同東南亞城市度過。故此今日有人講《號外》雜誌，講丘世文，講陳冠中，其實好可能係一個文化迷思（myth），記得當年中環人之中，睇《號外》嘅只係極少數！