奧運聖火後日就會嚟到香港，為咗畀阿爺知道香港人有幾咁愛國，一個由政、商、演藝界組成嘅跨界別民間自發組織「全民迎聖火──中國加油」噚日及時而出，話要推動全港市民愛國迎聖火。佢哋發起喺呢個星期五（5月2日）聖火傳送當日搞「紅衣日」，呼籲全民當日着紅色衫迎聖火，實行「染紅」香港。
呢個組織來頭唔少，搞手包括貿發局主席蘇澤光、行會成員陳智思、醫管局主席胡定旭、港鐵行政總裁周松崗。佢哋噚日個個着住件紅色Tee出嚟開記者會，件衫上面寫住嘅「中國加油」，更加係由劉華題字。蘇澤光仲話，佢哋一班朋友憑住一顆愛國心，當聖火嚟到香港時，會熱情激動咁歡呼「北京加油」、「中國加油」。
胡定旭叫員工着紅衫
佢咁講仲未算肉麻。胡定旭話，佢由聖火喺希臘出發開始，一直追住新聞報道，體會到聖火傳送路途係幾咁崎嶇，仲學晒領導人口脗，出口成詩，改咗李白《早發白帝城》嘅詩句做「兩岸猿聲啼不住，聖火（原文為「輕舟」）已過萬重山。」周南喺八十年代中英前途談判都引述過呢兩句，可見胡定旭愛國得嚟冇乜新意。佢仲呼籲醫療界當日着紅衣或戴紅色飾物，不過唔會強迫員工死跟喎。
周松崗話，希望全港運輸界都響應當日着紅衫；但港鐵有自己制服，唔可能臨時改，不過當日港鐵員工鍾意嘅話，都可以戴啲紅色飾物。佢強調呢個係個人呼籲，打工仔唔使驚有壓力要表態。八方記得有啲港鐵員工嘅制服係黃色，如果再加紅色嘢，咪即係黃加紅變橙，可能俾人以為暗中響應國殤之柱創作人高志活發起呼籲關注北京奧運人權問題嘅橙色運動都唔定喎。睇嚟5月2日返工着乜嘢色衫都係一門學問。
人人講愛國，當年支持過董建華連任嘅藝人譚詠麟都唔執輸。佢話南韓02年搞世界盃時人人着紅衫，希望香港都可以學似佢哋咁上下一心。校長老友曾志偉講起聖火，就聲都震埋，佢話睇到同胞喺外哋保護聖火，令佢好感動。佢仲話香港人雖然友善，但係更加愛國。
印國旗區旗派畀市民
佢哋除咗叫人着紅衫，仲會印國旗同區旗派畀市民為聖火打氣。蘇澤光仲提醒市民喺慶祝活動過後，千祈唔好隨便棄置國旗同區旗，真係愛國得嚟又細心。
政府發言人話，好支持呢個活動，會鼓勵公務員響應，教育局都會去信各幼稚園同中小學，將星期五定為特別活動日。八方知道香港好多識時務嘅俊傑，既然仲有幾日先傳聖火，不妨諗諗整套新制服歡迎聖火啦，阿爺實會記住你嘅！
mailto:[email protected]