現年38歲的莫可欣跟比她年長6年的男友方中信拍拖12年，感情穩定，去年她意外有孕，不擅辭令的方中信卻被誤會不想當爸爸，其實他非常期待這位家庭成員的誕生。經超聲波掃描，醫生告知他們的愛情結晶品是一名女嬰。
沒有育嬰經驗的方中信近日臨急抱佛腳，可欣爆他對腹中塊肉進行另類胎教，當他感覺到BB在可欣肚皮內撐動時，霎時興奮莫名，但當發現BB要休息，他竟然想搞醒BB一齊玩，反斗爹哋本色，表露無遺！ 撰文：比華利
莫可欣去年與男友方中信成功製造愛情結晶，早前她照過超聲波，知道腹中塊肉是女嬰後，兩人均雀躍不已，十分期待小B女6月中來臨。已懷有8個月身孕的可欣，日前接受本報記者訪問，雖然見她肚大如籮，體重直達155磅，但依然行動自如。
決定剖腹產女
為迎接小生命來臨，可欣除小心安胎外，還時刻保持開朗心情。怕抵受不住自然分娩痛楚的她，跟醫生商量過後，已決定擇日入院剖腹產女，她說：「我咁大個女都未住過醫院，莫講話入手術室，日子越近我越驚。我同醫生商量咗，到時會半身麻醉，因為我想親眼睇住BB出世。」
可欣還謂產後會用母乳餵哺，她說：「一來食人奶BB會健康啲，二來令我哋更加親近，增加親子關係。」
在這段倒數期間，可欣仍堅持每天朝九晚七返MTV台工作，她說：「慶幸BB都好錫媽咪，陀住佢以嚟都唔太辛苦，但因為生咗之後，我會放三個月產假湊女，所以呢排我逐步將工作慢慢handover（交接）畀同事。工作量可能大啲，隨住個肚越大咪攰啲，但OK，我平時做開運動，都應付到。」
見可欣無論購物還是上班，左手無名指都戴了一枚紅豆般大的鑽石戒指，十分耀目。問是否方中信送的求婚禮物？她即甜到漏地說：「佢送點止咁細粒。」
可欣還爆料指即將為人父的方中信，心情十分緊張，她說：「有時BB喺我肚裏面撐手撐腳，方生都想同佢玩，BB最活躍係我食嘢嘅時候，因為佢都有份吸收，撐得好犀利。當我臨瞓，BB有時都撐唔停，方生咪對住我個肚同佢胎教傾偈，有時BB反應冇咁大，方生又話要叫醒佢一齊玩，真係俾佢笑死。」
問可欣平時有否對BB胎教？她說：「有㗎，我好鍾意音樂，平時喺公司成日有歌聽，返到屋企同揸車都離唔開音樂，我最鍾意聽平井堅、NorahJones、Pavarotti（巴伐洛堤）同EdithPiat嘅歌，BB一齊聽都反應好大，我諗佢將來一定好鍾意音樂。」
增聘菲傭湊B
那麼方中信有承諾產後有獎賞嗎？可欣笑說：「其實呢一年我都未休息過，同佢生BB都算一個大工程，半年後等BB大啲，我會同方生去一個trip過二人世界，BB就交畀菲傭照顧。」放心得下嗎？可欣說：「屋企會請多個菲傭做家務，一直跟我十幾年嗰個就負責照顧BB，我平時見佢照顧我啲狗好細心，試過有隻狗仔唔舒服，佢貼心幫佢按摩，咁有愛心，我同方生都放心畀佢照顧BB。」
攝影：陳俊強
場地：naturespurest（海港城）
孕婦餐單
懷有8個月身孕的莫可欣沒有特別進補，只如常飲食，她說：「我只係戒食牛肉，生過BB嘅朋友話孕婦飲食習慣會改變，但我嘅口味變化唔大，只係食量增加咗，我都冇乜要食補嘢，只係多飲咗牛奶同食多咗芝士。」
-早餐-
（平日）牛奶一杯、多士一件
（假日）火腿煎蛋公仔麵或薯蓉
-午餐-
煎雞柳或魚柳
-下午茶-
熱奶一杯或即冲熱麥片一杯
-晚餐-
蒸魚、炒菜、肉類、白飯、紅蘿蔔豬肉粟米老火湯
掃萬元BB床
莫可欣的預產期是6月中，為怕BB趕出閘，準媽咪近日陸續添置嬰兒用品，她留意到有調查指香港嬰兒的睡眠質素欠佳，她相信「工欲善其事，必先利其器」，故近日花費不少腳骨力，行勻港九多間嬰兒用品店，為的是購買舒服嬰兒床給小寶寶。
日前可欣抽空逛尖沙嘴嬰兒用品店naturespurest，對一張價值近萬元的木製嬰兒床愛不釋手，還立即訂購，之後更挑選了大量嬰兒服裝和用品。可欣又攬着BB用的咕𠱸，更將臉頰枕上測試，她說：「真係好軟熟。」慈母本色顯露無遺。
可欣隨後又細看貨架上印有可愛圖案的BB服裝，由包被到和尚袍等，包羅萬有，最後買了BB由初生到三個月大的大量日用品。眾多東西中，她特別推介小型頸枕，她說：「BB嘅頸骨好柔軟，呢個U形頸枕，正好用嚟托住BB嘅頸部，抱住佢都唔怕扭傷BB條頸。」可欣越買越爽手，結果埋單逾20,000元。
買定20斤薑
產後坐月期間，可欣要吃薑醋驅風補身，同是93年的港姐季軍余少寶非常有心，替可欣在朋友的農莊購下約20斤薑，可欣說：「我都諗住派薑醋畀朋友食，買到靚薑梗係好，薑醋未開始煲，不過我吩咐咗菲傭將啲薑洗亁淨曬一曬備用，至於煲薑醋嘅份量，就要等陪月教我喇。」
定育女大計
電視廣告經常宣傳養大一個小孩要花400萬，莫可欣和方中信絕對有能力做「多產」父母，但他們早已決定一個夠晒數。可欣表示剛懷孕時已四出替BB找幼稚園，雖然嬰兒尚有個多月才出世，但可欣已有全盤育才大計。
抗拒填鴨式教育
可欣小學時隨家人移民瑞士，在彼邦長大的她非常嚮往自由，她說：「香港小朋友嘅教育太填鴨式，將來我都希望佢出國留學，瑞士嘅學習風氣同環境都唔錯，又或者安排佢返內地讀書。」有指可欣曾在個人網誌狠批廣州的天氣和交通不能忍受，她放心讓子女獨自返內地嗎？她說：「𠵱家同將來都會唔同，等BB長大，十幾年後乜嘢都唔同晒。」
不少明星第二代都愛穿名牌，又熱衷入娛樂圈，可欣對此說：「我一定會好好教育，要佢有正確價值觀，一定唔主張成身名牌，咁樣太奢侈。」方中信和可欣也盡量不讓子女在水銀燈下工作，可欣說：「我唔會強硬唔畀子女入行，但會同佢哋分析利與弊，最終由佢決定自己嘅路。」
問可欣會否讓女兒參選港姐？她說：「做得我同方生（方中信）嘅囡囡，都一定靚啦，使乜參加選美。」
