最近嘅火熱話題梗係08奧運，而為咗睇真啲這項四年一度嘅盛事，唔少人已計劃將家中電視棄舊換新！以香港地地少人多嘅環境，大電視唔使諗，投影機免問！所以家陣32吋LCDTV就最多人選擇，大細啱啱好，無論睡房同廳都啱擺，最近連大尺寸全高清標準亦下放到32吋，就知市場有幾大。加埋專家教路，原來屋邨環境都夠Quali玩短投㗎！
咪以為得LCDTV大小通吃，原來一直被視為中產玩意嘅投影機，亦已經由豪宅殺入幾百呎細屋。「咪諗到佢咁矜貴，如果你屋企客廳有3米距離，已夠你睇得舒舒服服，連幕牆一齊買仲唔使$10,000㖭，平過全高清電視，連牛頭角順嫂都玩得起㗎！」講得咁豪氣嗰位，就係專業影音顧問Ricky，其所屬公司更獲THX（CERTIFIEDHOMETHEATERTECHNICIAN）認證，據聞全港不足五間公司具此認證，來頭不小。
30度視角距離最正
究竟邊一個距離適合睇邊一款電視？據Ricky講，行內有所謂嘅「3H」標準，即係將屏幕高度乘3咁解。如果套用於32吋高清電視，咁最合適距離咪即係3呎9吋（高15吋×3）？「梗係唔啱啦！其實3H屬於CRT年代嘅計算方法，因近年陸續推出高清電視，解像度同畫面質素均相對提升，3H已經過晒時！」Ricky解釋，高清電視並冇劃一距離標準，但假如屏幕同眼睛視角成30度嘅話，呢個距離欣賞應該就最Fit喇！
3米投射100吋屏幕
「要玩盡幾百呎空間，齋睇部32吋高清又點會滿足呢？」講緊嘅係屋邨環境，Ricky話，近年多咗唔同類型顧客要求安裝投影機，當中屋企得幾百呎嘅亦唔少，「雖則話香港地少人多，但係客廳點都有幾米距離啩，如果夠3米或以上，已做到100吋短距離投射。」Ricky解釋，呢個距離剛好同眼睛視角成30度，唔單止睇電影特別有壓逼感，就算有架車喺畫面上左飛右插，個頭都唔使擰來擰去咁辛苦，對住喺細屋嘅電視發燒友而言，啱晒要求！
