銀行減息、人仔升值，令港幣越嚟越唔見使，大家都諗計睇吓點樣等啲錢好使啲。最近德福花園分別有兩個租客，索性一次過交晒全年租金，希望咁樣可以有高啲議價能力，叫業主收平啲租，反正啲錢放喺銀行都冇息收咁滯。
據中原地產九龍灣德福A組高級分行經理林麗芳話，早幾日德福花園有兩宗租務成交，租客都主動提出，一次過畀晒全年租金，但就要求業主減啲租，結果兩宗租客都成功承租，呎租低於市價約2%。
其中一個單位喺P座中層16號室，面積625呎，斟掂每月租金1.1萬銀；另一個單位喺N座中層2號室，面積562呎，成交月租1萬銀。兩個單位平均呎租分別係17.6及17.8蚊。不過平得嗰2%，只可以話好過冇囉。