繼大藍籌、紅籌股以及一眾國企股公佈業績後，輪到二三線股公佈業績，從業績所見，一些過往熱炒嘅轉型股，到今時今日可謂普遍都見光死，當業績公佈後，賬目一清二楚，可說是無所遁形。
以上周五為例，幾隻三四線股都公佈出現龐大虧損，如中油潔能（260）去年勁蝕1.85億元，雖然對比上一年只係蝕多百零萬元，但係隨着公司去年的加氣站陸續投入營運，業績仍如此惡劣，足見此股前途「似咁」。
中策連蝕五年
剛宣佈搞礦嘅中策集團（235）去年蝕咗4037萬元，雖然對比上年同期蝕少咗千幾萬，但係數一數呢間公司過去五年紀錄都係見紅，可說係全無起色。中國星集團（326）去年度轉盈為虧，蝕1.03億元，其06年度之3600多萬元盈利，可說是罕見，因其02至05年度業績都係蝕到飛起。
睇落只得兩隻股票叫做好睇啲，藥業股利君國際（2005）去年全年純利1.16億元人民幣，增長37%，PE11倍，不過不失。另海爾電器（1169）去年淨利潤上升22.8%至2.25億元，惟每股盈利攤薄至9.29仙。
今時今日刻意求冷搵股仔炒，絕對係吃力不討好。
歐陽風