中央救市未令大陸散戶鬆綁，所以唔少聲音希望中央再出招，不過，亦有人認為人為調控唔健康。《21世紀經濟報道》專訪咗中國證監會國際顧問委員會委員戴立寧講吓呢個話題。戴立寧曾主持台灣證券業監管機構旗下證券管理委員會，通曉兩岸金融界嘅優劣，喺專訪裏面，不乏揶揄台灣市場嘅言論。
對於大陸股市升跌，戴立寧認為係供求問題，所以佢贊成降低上市門檻，增加股市嘅供應。對於有人質疑，連啲唔賺錢嘅公司都畀佢上市，害死散戶，戴立寧嘅睇法係：「證券市場投資者買的是未來，但我們得到的資訊其實是過去的。過去盈利不錯的企業可能處在『夕陽無限好』階段，現在虧損的企業可能是未來的明星。」
證監會只是小拇指
有幾十年監管經驗嘅戴立寧更用五隻手指嚟形容市場，手指公係投資者，至於食指係證券服務業，中指係媒體同會計師、律師等中介服務者，無名指係上市公司，監管機構只係手指尾啫！
即係話，市場參與者各有分工，數到手指尾先係監管機構，戴立寧話：「五指中，小拇指是最弱的，但當我們合掌拜佛的時候，小拇指是五指中在最前面的，是最靠近佛。證監會實際上就是小拇指，它本身在市場上沒多大力量……小拇指透過佛法，就是法律的力量，可以有權制訂規則，規範市場的行為。」